ادارة جامعة 🏫 المفروض أنها جامدة ، صيتها مسمع
مفيش أجمد منها فى مصر 🇪🇬 مجمعة الصفوة ، من طلبة وأساتذة 👨🏼🏫👩🏻🎓
حلم كل طالب 👨🏻🎓 أنه يبقى خريجها 🎓
بس ياترى تستاهل مصاريفها 💵
ولا اسم على الفاضى والتعليم بقى تعليم وا**طى مالوش دعوة بالعالى
هنكتشف خبايا الجامعة من بعد ميتنج كانت هتنظمه ادارتها لإختيار مديرين لأقسامها لكن يحصل جريمة تقلب الادارة على بعضيها
ما هى القتـ***يلة 🔪واحدة من المرشحين للمنصب
فالمدعوين فى الميتنج بقى مشكوك فيهم غيرة عمل ممكن ، مصالح فى الخبا ممكن كل شىء جايز
أصلهم طلعوا ولاد لذينة وكل واحد ضميره مش صافى
وتبدأ التحقيقات وواحدة واحدة هنتعرف على أساتذتها اللى المفروض قدوة لطلابها
هنشوف الأستاذ المتحـ***رش اللى مش سايب ولا أساتذة ولا طالبات فى حالهم والاسم خايف على مصلحتهم وبيلعب دور الأب الطيب
هنشوف اللى العقد ملياها وبتطلعه على الطلبة فى شكل ادفع علشان تعدى أو …. تطلب زى ما تطلب
مجتمع غريب هتلاقى نفسك واقع فيه مع أحداث الرواية
ولا الرشوة وهى رايحة جاية حتى الظابط اللى بيحقق ماسلمش منها
معنى كده أنها عجبتنى …
لا للاسف بالرغم من أنها جريمة وتحقيقات وده نوعى المفضل فى الروايات
لكن الرواية ديه عندى عليها علامات 🪧 استفهام ⁉️
واحدة واحدة هقولكم عليها ومش معنى كده انى بحجر برضه على رأيكم انكم تقرروا بنفسكم تقروها وتقولوا رأيكم فيها
📌 اسم الجامعة ذكر صراحة فى الرواية ، مش فاهمة ازاى المفروض أن كده تشهير اكتر من دعايا
لأن البلاوى اللى ذكرت فى الرواية تعيب عليها
ومش قادرة افهم ازاى برضه يتساب الاسم منور كده بالبنط العريض فى صفحات الرواية
عارفة أن الأحداث مش حقيقية أكيد بس زى ما بيقولوا العيار اللى ما يصبش يدوش
📌 الألفاظ المستخدمة بين الأساتذة حاجة آخر قلة أدب الشتايم ذكرت صريحة من غير **** ولا تقطيع شتايم من العيار التقيل
طيب لازمتها ايه وتخيل بقى لما تسمعها بصوت أستاذ بيقولها لزميله أو زميلته 🤦🏼♀️
📌 صورة الأساتذة اللى اتشحورت فى الرواية يعنى لما اتخيل أن ديه أخلاق اللى بيدرسوا لأولادنا يبقى اقعد ولادى فى البيت أحسن 🤷♀️
📌 نيجى للأحداث تطويل بزيادة ومط وانت غصب عنك عايز تكمل علشان تعرف مين اللى عمالها فى الأستاذة فيصبر صبرنى
📌 القصة كانت ممكن تبقى مشوقة ومثيرة لو اتشالت منها النقط اللى فوق خاصة أن الجريمة نفسها كانت معقدة بمشاركة كذا شخص فيها 😉
#مكتبة_دنيا
#قراءات_٢٠٢٣