الرواية دراما نفسيه/ ادب اجتماعي. تقيلة جدًا، فكرتها نفسها تقيلة جدًا كتابة، كذكريات، كلمحة من لحظات تقدر تشوفها بعين الحي وبعين الميت.
اتقسمت في اولها الوان، وعلى حسب اللون في لمحة من قصة. كلها قصة واحدة في النهاية، كلها نفس العيون اللي باصة عالاحداث، بس في نفس الوقت انت بتشوف لمحات كتير، وبتشوف لحظات كتير من حياة مجموعة من الشخصيات اللي جمعتها الدنيا في وقت ما، واتفرقوا .
مكتبتش الريفيو اول ما اخلصتها علشان حاسة ان صعب الخصلها ريفيو من غير ما احرق وصعب اشرح طريقة الكتابة نفسها اللي اختلفت على مدار الرواية بين قصص قصيرة جامعاهم رواية واحدة، وكتابة مسرحية، وجانب مذكرات.
الكتاب دسم جدًا، واسلوبه عجبني الحقيقة ونقطة الالوان واستهلال الفصول فيها كان حلو جدا جدا فعلًا. الشخصيات كلها واقعية، كلها هتلاقيك شفت أو قابلت أو تواجد في حياتك منها، بدنيتهم وافكارهم وحكاياتهم. والمشاعر طريقة رسمها كانت ذكية الصراحة ووصلت، بالذات لحظات الضياع والألم .
الجزء الخاص باللون الاخضر هو تقريبًا اكتر جزء رعبني في الكتاب كله، شعور الفقدان فيه والحالة العامة اللي كانت مسيطرة عليه وعلاقته بالبحر والعائلة بالنسبالي كانت مخيفة فعلًا.
الرواية حلوة، واسلوب نورا جميل وذكي ومفيهوش محاولة تظاهر بالاسلوب على سبيل الحبكة، لا كله كان ماشي بسلاسة تامة. وحبيتها، وهجيبها ورقي.