الرواية دراما اجتماعية بتدور بالكامل في القرن الـ19 بين فتاتين من مستوي عائلي مختلف و ظروف مختلفة بيجمع بينهم عهد صداقة وحب اخوي ورباط روحي بيخليهم يتبادلوا الرسايل طول فترة حياتهم وبنبدأ نعرف خط سير حياة كل منهم والعالم السري الخاص بيها.

كم رائع من المعلومات عن الحياة بالصين القديمة، عملية ربط القدمين للفتيات، مبادئ اختيار العائلات و الازواج، تقسيم فترات حياة الفتيات بين الطفولة و الشباب و الزواج و حتي الشيخوخة و طبيعة الثورات و التعامل و المبادئ الملازمة لحياة الناس في الزمن ده . الرواية بتتنوع بين الأمل و اليأس و الاستسلام و الخضوع و الذل و الشرف و القيمة الحقيقية للفظ " حب و صداقة "، حبيت جداً فكرة وجود جملة :

" اطيعي ثم اطيعي ثم افعلي ما تريدين .. " مش بسبب الجملة نفسها لكن كتعبير عن شكل الحياة اللي كانت موجودة وقتها بالنسبة للنساء. فكرة إن البنت اقل من الولد اجتماعياً لإنها لا تحمل اسم العائله و هي مجرد فم زائد يتم اطعامه حتي ترحل لبيت الزوج و بعدها تصير جزء من عائله زوجها لا اهلها .. للأسف نظرة مازالت عالقه بأجزاء من مجتمعنا حتي هذه اللحظة . على قد ما كرهتها على قد ما حبيت انها اتناقشت في الرواية.

إحترمت قدرة الكاتبة علي إظهار سهولة ايجاد السعادة و الإخلاص حتي من بين اسوأ القيود و الاحوال النفسية و الاجتماعية، الحب الطاهر النقي بدون اطماع أو إستغلال و ما قد يغذيه أو يدمر ..

وتيرة الاحداث هادئة جداً علي مدار الرواية لإنها بتعرض قصه حياة فتاتين تحت قيود المجتمع مش أدب ساسبنس أو حبكة جريمة و خلافه، قصص الفلكلور اللي تم عرضها خلال اغاني النساء داخل الغرف كانت اضافه قيمة جداً لمعلوماتي شخصياً ..

لغة الرواية سهله و سلسه و راقية، لا الفاظ غير مناسبة ولا تشبيهات مبالغ فيها، تصوير الحياة و المشاهد بالفترة دي كان قمه في الامتاع ..

الرواية جميلة وهادية جدًا ومن الروايات المقربة لقلبي فعلًا.