مقدمة لابد منها..

انا كنت بقالي حبه بعاني من عدم القدرة علي اني اخلص كتاب ببتدي فُلة وبعدين بعطل.. لحد ما ابتديت اقرا سلسلة لاشين للكاتبة شيرين

هنائي وده كان تغيير مرحب بيه ولذلك وجب شكر الكاتبة

طيب خلونا نتكلم بالتفصيل لاشين هي سلسلة اتكتبت وصدر منها الي الان كتابين الاول عهد الدجالين والتاني أبناء ديهيا.. طيب انا كسارة مكنتش عندي هذه المعلومة اللهم الا اني افتكرت ان الرواية جزئيين لكني بعد ذلك اكتشفت انها سلسلة وان في عدد جديد نازل قريب ديه كانت حاجة نفيخة بالنسبة لي اني مكنتش اعرفها من قبل ما ابتدي لذلك وجب التنوية..

طيب يلا بينا السلسلة بتحكي قصة لاشين ابن احد الداجلين المعروفين الي بيتربي بطريقة معينة وهو محاط باسطورة ابوه، دجال معروف انه بيعمل حاجات مش مفهومة وبيتحيط به الشائعات من كل حتة وهو بيحاول يفهم ايه مين ليه عشان يبقي في منطق للأحداث الي بتحصل قدامه والاحداث بتنطلق من هنا..

اولاً: الوصف: الحقيقة الوصف بتاع الاحداث والمخاليق والجن وخلافه معمول بطريقة صايعة مما ساعدني كقارئة اني اتخيل الي بيحصل كانه صورة في دماغي مع كآبة الاحداث وشناعة بعضها ده كانت حاجة مكدرة في بعض الاحيان ومسليه في احيان اخري لكن شابو للمؤلفة لقدرتها علي إيصال الاحداث والمناظر وحتي الروايح في بعض الاحيان بلغة سلسلة ولكنها تفصيليه خلتها كانها بتحصل قدامك..

ثانياً رتم الاحداث: الاحداث بتنط من زمن لزمن ومن شخصية لشخصية بطريقة سلسلة ومرتبة بتخليك ماسك الخطوط كويس لكنك في نفس الوقت متزهقش مما ساعد وبشده علي القضاء علي عامل الملل في الكتب ولذلك شابو تاني للمؤلفة..

ثالثاً: السلسلة مبنية علي احداث ما بعد اسطورة "بعد منتصف الليل" للكاتب احمد خالد توفيق الي قايمة علي فكرة برنامج راديو بيتذاع فيه قصص رعب.. وجود الحلقات ديه علي يويتيوب كان حاجة قمة في التسلية بالنسبة لي وساهم علي أيصال احساس اني الاحداث ديه بتحصل بجد حاجة جابتلي تريب ولكنها كانت حاجة جديدة بالنسبة لي.. برافو علي التجديد..

الي هنا الحاجات كلها عنب الي عنب، ايه بقي الي معجبنيش كسارة..

زي ما قلت الكتب ديه عبارة عن سلسلة وواضح انها مكملة معانا بعض الشئ كان هيبقي لطيف لو في كل كتاب كان فيه حكاية صغيرة جوا الحكاية الكبيرة الي هي عامود السلسلة وكل واحده بتخلص مع كل كتاب مما كان هيدي للقارئ الي هو انا احساس ان في قصة خلصت وفي نفس الوقت في القصة كبيرة مكملة معانا هنستنها في الكتاب الجاي.. لكن لما ده محصلش حسيت بنوع من الاحباط ضايقني بعض الشئ وكأني مجاليش احساس الانجاز والاستمتاع الي بيجيلي لما بخلص كتاب ده.. ديه حاجة ممزجتنيش

لكن ده لا يمنع اعجابي بالقصة الكبيرة الي بتتحكي في السلسلة والبيلد اب بتاعها وترتيب احداثها..

انا كسارة بشجع علي قراءة السلسلة لكني لو عرفت انها سلسلة كنت استنينت لحد ما كل الاعداد تنزل