مجموعة اصدقاء عايزين يكسروا الملل، ف بيجيبوا لعبة عادي جدا و بيبدأوا في اللعب
و من هنا حياتهم بتتقلب و بتتغير ١٨٠ درجة!!!
و بيدخل بينهم الغدر و الكره.. و الدم!!
ف هل هيكون نهاية لعبهم.. حلوة؟
الرواية دي او خليني اقول بمعني اصح النوڤيلا دي حلوة.. حلوة بس
لانها كان ممكن تبقي اجمل من كدا بكتييير
مبدئياً انا استمتعت بالعمل الصغير دا و مستحيل اقول عليه لفظ (وحش) طبعااا!!
بس كان نفسي الكاتب ياخد مساحته اكتر في العمل عشان يبقي احسن من كدا.. كون انها نوڤيلا تقع في ١٤٠ ص دا كان حابس الكاتب ف قالب ضيق جدااا مخليه مش عارف ياخد راحته
بمعني ايه؟!
يعني السرد كان كويس.. بس مش ساحر كدا او سلس.. يعني الوصف و رسم الاماكن و الاحداث مكنش علي مستوي عالي.. و في بعض الاوقات كان بيبقي متكروت و سريع كأنه مقال.. او نشرة اخبارية
مش سرد روائي!!!
نفس الكلام في رسم شخصيات العمل.. شخصيات سطحية ملهمش شكل معين ولا طريقة كلام معينة.. و عارف ان مساحة العمل لا تسمح ب دا.. بس ع الاقل احفر في عقلي شكل يميز كل شحصية!!
و الحق يقال ان الشخصبات كان ليها بناء و خلفية الي حدا ما، جيد👌
الحلو في العمل دا، الفكرة ( الي هي مكررة اصلا ) بس برده تناول الكاتب ليها كان ممتع و حلو.. انت حرفيا مش هتعرف تسيب الكتاب غير لما تخلصه و دا لان الكاتب فعلا نجح ف رفع مستويات التشويق
تصنيف العمل يعتبر رعب ((معوي)) بس كان لااازم يبقي تصميم مشاهد الرعب جريئة و فيها مشهادية عالية اكتر من كدا!!
لان دا تصنيف العمل في المقام الاول
النهاية.. حلوة و في كذا بلوت جامدين
بس للاسف نفس الكلام بتعاني من التسرع و الربكة بسبب اختيار الكاتب وضع قصته في عدد صفحات صغير🤷🏻
الخلاصة.. قضيت ساعتين حلوين.. استمتعت جدا
بس كان نفسي شوية السلبيات دي متبقاش موجودة
لان حقيقي الكاتب بيعرف يشد القارء و يتناول قصته بشكل جميل جدااا
ان شاء الله منتظر منه الجديد.. و الاحسن ♥️