عودة للمراجعات بعد انقطاع طويل🏃🏻♀️
اسم العمل: في المنزل المجاور
الاسم باللغة الأصلية: the couple next door
تأليف: شاري لابينا
ترجمة: سلمى الحافي
عدد الصفحات: 359
****
حكايتنا بدأت بالأخت آن مع جوزها ماركو، واللي كانو معزومين عند جيرانهم للاحتفال بعيد ميلاد الجار، واللي مراته سينثيا قررت قرار؛ ممنوع اصطحاب الأطفال🤷
اضطرت آن -مريضة اكتئاب ما بعد الولادة- إنها ترضخ لجوزها وتوافق تسيب كورا -كتكوتة غلبانة عندها ٦شهور- لوحدها ف البيت بعد اعتذار جليسة الأطفال، عمنا ماركو قالها ده البيت لزيق البيت يا آن متبقيش قفوشة أمال...وكل نص ساعة يا ستي هنبجي نشقر عليها، عدي الليلة🙆🏻
بس عشان الواد ماركو ده مش سالك فالليلة معدتش...
لما رجعوا البيت بعد الساعة واحدة كدة، وبعد كثير من الهيء والميء...كورا مكنتش ف سريرها، البنت اللي يادوب ست شهور اختفت!
انهارت آن، وبدأت واصلة الست الأمريكية الأصيلة...انت السبب يا ماركو روح منك لله، وجت الشرطة بعد تبليغهم بحالة الاختطاف...
وبدأ المحقق رازبارك تحقيقه وتحليلاته، ياترى مين خطف كورا وايه مصلحته ف كدة؟!
****
تسلسل الأحداث كان ممتاز، والدلائل الموجودة لإدانة كل مشتبه كانت محبوكة كويس أوي...بس بما إني الفترة دي متقمصة دور "يكتشف الغامض والمثير" فاسمحولي أقول إني اكتشفت الجاني ودوافعه من الأول، هل ده معناه إن الجاني متوقع؟ لو انت قارئ قديم، وحارق كل الأفلام الأجنبي الشبيهة بفكرة الرواية؛ فآه هتتوقعه بسهولة.
عندي مشكلة مع قفلة الرواية، حرفياً طلعتني م الموود وسابت أثر سلبي جداً...اللي هيقراها هيعرف ليه.
فوتكوا بعافية🏃🏻♀️