كان ياما كان مش من قديم الزمان ولا حاجة

ده فى السبعينيات

قصة حب صحيح ما توجتش بالزواج 👰‍♀️🤵🏻‍♂️ويمكن ده اللى خلاها ذكرى حلوة وماتنسيتش مع الزمان

اعذرونى اصلى بقيت شايفة أن ساعات الجواز بيهدم الحب اللى كان 😌

بيبوظه التعود مع شوية اهمال

لكن القصة ديه حلاوتها انها ماكتملتش 😁

علشان كده اتحكيت من القلب بإحساس وبتمنى

يمكن لو كان جمعهم بيت ماكناش سمعنا عن الحبيبين🤷‍♀️😉

حكايتنا حكاية رجل كلاسيكى حب فى سره 🤫ومعترفش لحبيبته كتم فى قلبه حبها لسنين وشافها وهى بتروح من الايد وبتبعد بعيد مع حد غريب

وهو كمان موقفش به الحال

طيب ما الاولى كان جمعكم بيت 🏠 بدل مفيش حاجة تمنع الحبيبين

لكن للاسف الخوف من البوح طلع عيب وعيب خطير فرق بين اتنين

ناس هتقول نصيب و كده كده ماكانوش لبعض مكتوبين

صحيح بس ده لو عملت اللى عليك 🤷‍♀️

لكن تقف محلك سر وتجيبها فى النصيب يبقى بتعلق خيبتك على شماعة " اعمل ايه ❓"

بس هناخد الحلو من الموضوع أن " جدو مصطفى " عايشنا فى رسايله جو من الحب النظيف المفقود اليومين دول

شاعرية من زمن فات ماتمحاش مع الزمان وفضل على ذكراه حتى لو من طرف واحد فضل فى نفس المكان اللى قضى فيه أيام ما كان النظر للحبيبة اقصى ما يتمناه…. حكاها بشكل مرهف الإحساس حتى فى وصفه للحى اللى شهد فيه حبه لبنت الجيران … شوارعه وبيوته وحوانيته تشم ريحة الذكريات وانت بتتمشى وتدخل معاه للحلاق وتسمع حكاوى عم " كمال " وقصصه مع زباينه اللى فضلوا معاه مهما فتحت صالونات … أصل العشرة ما بتهونش إلا على ولاد ….. ولا بلاش

اصل دلوقتى مابقاش ولا فى عشرة بتبقى ولا حب زى زمان … بس ماننكرش ان حكايتك حببتنا فى الحب بتاع زمان ويمكن لما نقراها فى كتابك اللى هينزل فى الاسواق بمساعدة " المفعوصة " زى ما اطلقت عليها يخلينا ناخدها حكمة ونعمل بها كمان ومانكتمش حب حسيناه فى قلبنا ناحية انسان أى كان مش شرط يكون لحبيب ممكن لصديق لأهل لأخوات …. حبوا بعض قبل ما يفوت الأوان 💙

رواية كلاسيكية من زمن جميل بعيد عن ذوقى تماما صحيح بس حسيتها رواية مهدئة للاعصاب تاخدك كده لزمن جميل ايام فعلا ماكان الحب برىء ويتصدق من نظرة عين 💙

#مكتبة_دنيا

#قراءات_٢٠٢٢