ماماة: هي الكاتبة اليّ كتبت جريمة العقار ٤٧ دي مصرية يا منى؟

انا : أيوة يا ماماة مصرية ولطيفة جداً، اشمعنى؟

ماماة: دي بتكتب حلو جداً انا اضطريت اقفل الرواية علشان خلاص كنت لازم انام

انا: يعني فعلاً هي اجاثا كريستي المصرية ؟ اصل الناس بتقول عليها كدة

ماماة: لا دي احسن لأنها قريبة فعلاً من الحياة المصرية وتحسي انها مش شيء افتراضي.

انا: يعنى عجبك الكتاب ، اكلمها اقولها؟

ماماة: عجبتي جداً وعايزة باقي كتبها وبوسيهالي على الأهداء الجميل وعايزة اشوف صورتها

ولما شافت الصورة كان تعليقها: ايه دة دي قمر ووشها مريح - الجريمة اتغيرت قوي عن زمان

*****

ما سبق حوار بيني وبين مامتي النهاردة الصبح بعدما حكيت لها مغامراتي في المعرض وان في قصص جريمة من اليّ هي بتحبها لواحدة كاتبة اسمها اجاثا كريستي المصرية او Noha Daoud

المهم ماماة مكدبتش خبر وطلبت الكتاب وسبحان الله حظي حلو نهى كانت في المعرض ومضت لها الرواية وجعلت سعادتها مضاعفة.

ماماتي قارئة غير تقليدية وبتقرأ من اكتر من ٧٥ سنة ولها في الأدباء حتى الكبار وجهة نظر متميزة - كانت تعشق اجاثا كريستي وتقرأ كتبها بالانجليزية وبعد كدة مترجمة وكانت تحب جداً هذا النوع من الأدب - نهي داود رجعتها تمسك كتاب بعد سنوات طويلة من التوقف علشان عينيها بتوجعها .

انا بخاف وبتوتر من قصص الجريمة شوية - بس اليّ محيرني ازاي حد كيوت و رقيق زيك يكتب جريمة - على رأي مامتي : الجريمة احلوت اوي❤️