مراجعة وريڤيو للمجموعة القصصية #كشكول_المجهود_الشخصي

الكاتبة : منى رضوان

( ايوة بعمل ريڤيو لنفسي متتخضوش😂)

نبذة عن الكتاب:

المجموعة القصصية مستوحى فكرتها من الكشكول الذي كنا بنستخدمه واحنا صغيرين في حصة المدرسة اليّ كانت مدتها ٤٥ دقيقة وكان بيضم الواجبات المدرسية لاكتر من مادة ودة بالضبط شبه تماماً ما تضمه المجموعة من قصص قصيرة باللغتين العربية الفصحى والعامية المصرية.

كل قصة من المجموعة تدور في زمن ثابت هو ٤٥ دقيقة - وعلشان كدة سميت كشكول المجهود الشخصي - ٤٥ دقيقة من الحياة.

في المجموعة تتكرر مدة ال ٤٥ دقيقة زي ما بتتكرر في حياتنا في عدة أمور زي الحصة المدرسية أو المحاضرة، او لقاء او شوط مباراة كرة القدم،المجموعة أحداثها منهن ما هي واقعية بنشوفها في حياتنا اليومية ومنها ما هو من خيال الكاتبة ( الليّ هي انا ) بشكل أدبي ،زي زيارة لطبيب نفسي، أو أحداث بتحصل في إشارة المرور، أو رحلة بالطائرة او حلم شفتاه في المنام.

اللغة والسرد: لغة المجموعة في اول ١٢ قصة هي العربية الفصحى والحوار بالعامية وتمتاز هذه القصص ان فيها عنصر مفاجأة او شيء من الفانتازيا او الرسائل ، اما لغة ال ٧ قصص الليّ في الأخر فهي عامية وتمتاز انها ساخرة ودمها خفيف وتضحك ( كما قال لي كل الناس - مبحليش البضاعة وخلاص والمصحف 😂)

رايي في المجموعة: ارشحها للقراءة لكاتبة دمها خفيف وعندها حسّ ساخر وجزء فانتازي.

_______________________________________

كل ما سبق هو رأيي الشخصي والحقيقة حبيت اقوله لأنى انا اول قارئة للكشكول...ما يلي بقى هو بعض الاشياء عن كواليس الكشكول وحاجات اخرى احب اشاركم فيها:

- الكشكول دة فيه كل الناس الليّ بحبها يا اما بشخصياتهم يا اما بأسماءهم او احياناً بالأتنين...شخصيات مؤثرة في حياتي ولكن ليس في حياتي فقط لأنهم رموز وفي حياة كل واحد حد زي الشخصية دي بس بأسم وشكل تاني.

- في حاجات في المجموعة تتجاوز البعد الوقتى لأمور لانها تجربة قبل كل شيء فنشوف فيها البحث عن شيء يحتوينا ، واننا مع الأسف نُهزَم بالأشياء التي نبالغ في الاهتمام بها وولاد شيرمين الليّ بيحاصرونا في كل حتة والكوز والبانيو في مقارنات ومقاربات معيشية والصديق الوفي والكورونا وعمايلها من تحولات في حياتنا والنيش الليّ ميلزمنيش والرجل الالي بسلامته متخفي في مغارة وقصة عبد البديع والكتاب الليّ خطف القاريء وال CV الليّ على وشنا ودعائي الدائم : يا رب السرطان يموت والأنترنت وبلاويه وجاتها نيلة اليّ عايزة خلف وجواب اعتراف وزنقة في اشارة مرور وعرق تركي هيعمل مشهد كبير والدكتور الليّ بيحل المشكلة وجروپ المامييز وانهيار رجل فيها

- دة او كتاب ليا وطبعاً مش متعودة ان الناس تبقى عارفاني - حصل معايا مفارقات تنفع تبقى كتاب كوميدي والله العظيم ...زي مثلاً حد يقابلنى ويقولي : ايه دة انت بتاعة الكشكول الاصفر📒اقولهم ايوة انا بكل فخر😂

او اروح مكتبة وادخل فيها واكون متنكرة بقى قبلها ( لابسة كمامة ونظارة ولامة شعري وبحاول اتكلم بصوت مختلف) - اخش اسأل على الكتاب الاقي الراجل يقولي اهو هناك يا بشمهندسة منى😂😂 مرة خرجت عن شعوري وقلتله انا كان ناقص اركب شنب والله العظيم والليّ في المكتبة سخسخوا من الضحك😂😂

- الكشكول ادانى فرصة اودع حد بحبه وداع خالد...اختى الله يرحمها ويحسن اليها وكتبت قصة لها وعنها ...افتقدها كل يوم واشعر انها معايا.

- بعد نزول الكشكول بقى بيحصل معايا حاجات بتخلي يومي وحياتي مختلفة...رسايل الناس الليّ قرته والريڤيوهات بتاعتهم بتقدر تحسن يومى والله العظيم بشكل لا يوصف...ربنا يخلى ويكرم كل شخص فكر انه يبعتلي ويحبر بخاطري ويسعدني ♥️

- اخر واهم نقطة : انا اهديت الكتاب لمامتى وهي اكتر واحدة مستحقة له، ماماة هي الداعم الاول والمحرك الاساسي ليا من وانا طفلة صغيرة في كل تطور او حاجة كويسة اتعلمتها او عملتها...الكشكول بقى جزء مهم في حياتها يمكن اكتر منيّ وفي كل يوم سؤال تقولي فيه ورينى الريڤيوهات ورينى الناس قالت ايه ...ويا روحي تتاثر وتعيط من السعادة...كمان مامتى عرفت ناس جديدة زي ما انا عرفتهم سواء قراء او كتاب او القائمين على چروپات القراءة...بتتكلم عنهم اكنها شافتهم وقابلتهم، الخلاصة ان الكشكول خلق لي حياة اخرى جميلة بسببكم واسعد معي اهم حد في حياتي ♥️مامتى♥️

الطبعة التانية من كتابي صدرت اول اغسطس، دعواتكم ليا ان يستمر النجاح الليّ انتم الاصل فيه