المرأة والجنس..كتاب مهم لنوال السعدواي وهو يعتبر كتاب علمي إجتماعي وأعتقد إنه كتاب يصلح جداً أن يدرس أجزاء منه في المناهج التعليمية...

الكاتبة إتكلمت علي حاجات كتير في الكتاب مثل مفهوم العذرية و أهميتها في المجتمعات الشرقية،إسلوب التربية في المنازل الذي يؤدي إلي شعور بالنقص و الكبت عند الكثير من البنات...

التعليم في المدارس الذي يساعد علي نظرة المجتمع الذكورية للمرأة وتقليل من قيمتها..

بتتكلم أيضاً عن الزواج ،العمل والإنجاب وحاجات كتير أوي و بتعرض وجهة نظرها كالعادة بسلاسة وبجرأة كما انها كانت تستعين في الكتاب بقصص حقيقية عالجتها بنفسها كونها في الأصل طبيبة...

الكتاب مش منظم أوي و في تكرار كتير لدرجة إنك ساعات حتحس إنك بتقرأ مقالات مجمعة...

تقييمي للكتاب كان حيكون ٤ نجوم ولكن في أجزاء في الكتاب فعلاً مستفزة و خلتني أتعصب جداً و أنا بقرأ...

علي الرغم ان الكاتبة امرأة وتنادي بحقوق المرأة ولكن الصراحة فيه عندها بعض الأفكار أو ممكن نسميها بعض الشطحات التي لا تقبلها أي امرأة خصوصاً لو كانت أم ..مثل نظرتها السلبية للسيدات التي لا تعمل لكي تهتم بأبنائها وأعتبارها ان البيت مقبرة للمرأة وإن الاطفال التي ترعاهم أمهم في سنواتهم الاولي بيكون عندهم مشاكل نفسية اكتر من الاطفال التي تتركهم الأم في دور الحضانة لكي تذهب للعمل!

الظاهر إن محدش قال للدكتورة نوال قبل كدة ان

الامومة هي أفضل و أصعب عمل في الحياة

and still very rewarding and satisfying job even if u dont get paid for it!

بس الظاهر المشاعر دي مش موجودة عند نسبة قليلة من السيدات و بيتعبروا كلامهم دة حرية و هو أبعد ما يكون عن ذلك...

بحب كتابات نوال السعداوي و كبرت وأنا بقرأ كتبها بس مش لازم أبداً أقتنع بكل أفكارها و بأخد منها اللي يناسبني فقط و بصراحة حاجات كتير من اللي بتقولها تمثلني جداً وتعبر عني وعن كل ست في العالم..

كتاب مهم أن تقرأه كل امرأة عشان تعرف حقوقها ومهم أن يقرأه كل رجل أيضاً عشان يعرف هو كمان إزاي ممكن يحاول يديها حقوقها اللي هو في الغالب ميعرفش إنها حقوقها أصلاً!