صورة نفسية مكركبة بإنتظام..
لما يبقي الكاتب اساساً مصور يبقي الرولية ليها نوع خاص من الرؤية ومن تجميع التفاصيل وإلتقاط الجواهر في كل كدر وفي كل لقطة منفصلة لوحدها والتصوير المفصل لكل مشهد بكل عناصره بوضوح.
يمكن يكون البناء الادبي للرواية مش قوي ولا ممتع لناس كتير زي ما قرأت قبل ما اجرب بنفسي ،لكن الرواية جاذبة لعشاق المذكرات والتفاصيل ولهواة اليوميات والتركيز في عناصر الكدرات والتصوير خاصة.
بعيدا عن كم الالفاظ الغريب لكن كونه موجود علي لسان شخص سليمان وتركيبته وزمنه وهلوسته وتخيلاته وبناؤه الدرامي فهو وارد جدا ومتوظف ولكن وجب التنبيه عليه سواء في مطلع الرواية ولو ان ده مش جديد في روايات مراد يعني لكن وارد يكون في حد اول مرة بيقرأ له فميعجبوش.
مراد حب يرمي حتت الجدل والتحولات الدينية في سياق الهلوسات ومن عقلية زي سليمان عشان تعدي وتبقي متقاله ع دماغ ملحوسة فالموضوع ميتاخدش ع محمل الجد لكن في حتت كده تقيلة وغريبة وممكن تسحبك لبعيد لو ماوعتش ليها وركزت هي اتقالت ليه وع لسان شخصية بالعقلية دي وبالدماغ والتكوين ده.
الرواية فيها زحمة تفاصيل غريبة وتكوينات شخصيات ربما تبدو مملة لكن زي ما قولت الوصف والمذكرات للي مبيحبش الطريقة السردية دي ممكن ماتكون حلوة لكن انا شايف انها طريقة مراد ف الحكايات انها من زاوية معينة وع لسان شخصية وطريقة زي يحيي ف الفيل الازرق كده ويحط تاتش الشخصية نفسها ع الكلام والي بيقوله وبيوظفه.
يمكن يبقي مراد خد الشخصيات الي عندها نوع ما من المرض النفسي او الهلاوس ملعب ليه وسكة حلوة لانه يخش ف قضايا وجدليات من خلال الشخصيات دي وانه وارد دماغهم توديهم للحت الي هو عاوز يقول فيها الكلام ده بس ع لسانهم ووارد لا، المعني ف بطن الكاتب.
الامثال الموجودة في الرواية حلوة جدا وشبة المواقف جدا ومتوظفة بطريقة كوميدية وماشية مع دماغ سليمان جدا جدا.
المعلومات التاريخية الي كعادة مراد بياخد وقت وبيشتغل عليها والي زي كل مرة ممكن يسيبك مع عنوان او اتنين لو دورت هتلاقيهم في جرنال قديم او تتابع احداث معينة حقيقية وهو عالجها او دعبس وراها لحد ما جاب قرارها ولقاها بأصلها وحط تاتشه عليها.
الشخصيات والمعاملات بين عنتر وسليمان وقشطة والوصف لكل شخصية بعين سليمان ودماغه يخليك بتشوفهم وتعرفهم وتتوقع زمنهم وطريقتهم وحركتهم من الوصف والتخيل للأفكار الخزعبلية دي وتحس بالهلاوس معاه وتشوفهم بعينه من جوه السطور او زي ما بيكتب ف التوقيع ع الرواية.. اقامة سعيدة في ال لوكاندة.
هل لرقم سبعة غاية ف انها تبقي الخطايا السبعة لكل واحد منهم ويبقي ده له علاقة بالتسلسل الموجود وبطريقة التفيذ المتنوعة الي تخليك تعيد قراءة كل طريقة مرة واتنين وتقةل إيه الدماغ الي جمعت الكلام ده وازاي فكر ف كده ولو ده مش حقيقي ومذكور فهي طرق تناسب زمنها وف نفس الوقت طريقة نسبهُ لكل ضحية باسم طريقتها حلوة و مساعدة في عز زحمة البشرية دي وتشابه اسماءها.
رواية دسمة وفيها زحمة وتركيز وتشغيل دماغ واثارة عصبية ونفسية حلوة وتخليك مشدودة ورا كم التفاصيل الرهيب ده وتسيبك تسرح بخيالك ف وسط كم الكدرات المتوالي من غير وزاوية مصور قادر يجسد القصور والاشكال والاشخاص بشكل منظم وقوي ويعمل منه بناء درامي حلو وممتع.