قرأت معظم كتب أزهر جرجيس و دايماً بعد الإنتهاء من أي كتاب له بكون محتارة أقييمه ب ٤ نجوم و لا ٥ بس هنا في حجر السعادة ولأول مرة أكون محتارة أقييمه بنجمتين ولا ٣!
تدور أحداث الرواية حول كمال توما الطفل الذي هرب من أهله بسبب قسوة أبيه السكير وعاش مشرداً في الشوارع لفترة من الزمن إلي أن تعرف علي خليل المصور الفوتغرافي الذي سيساعده و يعلمه أصول المهنة و يعيش معه حياة كريمة...
يلقي الكاتب الضوء -خصوصاً بعد النصف الثاني من الرواية -علي ظهور الميليشيات المختلفة في العراق و إنتشار العنف والدمار في البلاد حتي كمال توما الرجل المسالم وجد نفسه متورطاً مع أحدي العصابات المسلحة...
لغة الكاتب جميلة جداً و إسلوبه مشوق و إستطاع الكاتب أنه بخليني أسيب كل حاجة و أخلص الرواية في يوم واحد علي الرغم إنها ٣٢٠ صفحة...
يعيب الرواية إن فيها حبكات كتير غير مقنعة مثل عدم محاولة كمال أن يري أهله ولو مرة واحدة ،ظهور أخته المفاجئ بطريقة غريبة،التحول غير المفهوم في شخصية نادية حبيبة كمال وتحس إن الرواية كانت واخدة في الأول طريق أطفال الشوارع بكل مشاكلهم -و الجزء دة كان فعلاً مميز ومختلف عن معظم كتابات الكاتب السابقة- ثم بعد كدة بدأت الرواية تاخد منعطف تاني خالص..
مش بقول انهم مش مرتبطين ببعض بس حسيت إني بقرأ روايتين و إندمجوا ببعض بطريقة معجبتنيش أوي وطبعاً دة كله من وجهة نظري الشخصية و ممكن عادي أكون غلطانة..
علي الرغم من بعض العيوب إلا إنها رواية سلسة و ممتعة جداً في قراءتها و قلم الكاتب فعلاً من الأقلام اللي بحبها وحتي لو الرواية هنا معجبتنيش أوي لكن حفضل دايماً في إنتظار قراءة أي عمل جديد له:)