ذبابة في حقيبة سفر
الكاتب/ نشأت يونس
دار كوتوبيا للنشر والتوزيع
التقييم آخر البوست
طبعا الغلاف والتدقيق اللغوي والتنسيق النصي كويسيين جداً
الكاتب دخل داخلة حلوة شدتني لغة وأحداث وتصوير حاجة كدا عظمة على عظمة تحمست..... لغة الكاتب الفصحى ممتازة والخيال ينساب منها ويتدفق على ذهن القارئ بسهولة وبتخلي الصفحات تجري تحت عينك من غير ما تحس .... على الرغم من البداية الجذابة والقوية واللي توحي بحبكة ممتازة إلا ان سرعان الكاتب ما تحول إلى الدوران في فلك الشخصيات وبسرعة وبشكل مباشر مش بالتدريج حقيقي كان ممتع لكن قدرت تفهم الشخصيات بسرعة ودا من خلال المواقف والمونولوجات على حد سواء ودا حقيقة كان ممتاااااااااز جداً ميزان الكاتب بين المونولوجات النفسية وتوضيح الشخصيات بالحوار والمواقف مبهر جداً جداً بالنسبالي لأنه كان بين بين، يعني استخدم الاسلوبين باحترافية وسلاسة وجمال وبصراحة اتمزجت منها جداً....
بعد شوية بدأ يدخل في رواية القصة بشكل فضفضة أكثر من أنه عمل فني منظم وبدأ يحكيلك عن بعض التفاصيل اللي مش بتخدم القصة فحسيت وأنا بقرأ بأن الموضوع فضفضة
.
(مش بمعنى وحش لأ المقصود ان في حاجات الكاتب عاوز يحكيها على الرغم انها غير مؤثرة أوي في الرواية ودا مش أحسن حاجة بالعكس فنيا العمل المفروض كل ما يكون العمل مليان تفاصيل ومركز كل ما يكون أحسن)
.
كان في بعض الاسهاب في الوصف أي نعم لغته جميلة ووصفه ممتع لكن من وجهة نظري ان من معايير جمال العمل انه يكون مركز ومليان تفاصيل تخدم الشخصيات أو الحبكة بس متكونش تفاصيل زايدة عن اللزوم فيتحول لاسهاب في المجمل الوصف راااااااائع وان كنت محتاج يقل ويركز اكتر لكنه مش ممل
…
....
توضيح بس للي قلته فوق بدون حرق كتير للأحداث:
من الممكن أن يكون الكاتب عاوز يوضح ازاي البطل تعب وبذل مجهود علشان يوصل أنه يستقر في المهجر في ولكنه دخل في تفاصيل لا تخدم الحبكة اللي جذبني كقارئ بيها ومهما صبرت معه أجده يبعد بي عن بداية خيط الرواية أكثر وخلال الرواية يفعلها مراراً وتكراراً … الغريب ان الكاتب نفسه عارف انه بيبعد عن الموضوع وذكر دا صراحة لكنه فعله أكثر من مرة على طول الرواية …
لما حاول الكاتب يتكلم في الماضي كان لسان الجندي الأجنبي في القاهرة أكثر واقعية والحقيقة طريقة الحكي والحوار واللغة جميلة جداً ومتماسكة وتدفق الخيال ينساب وحسيت وقتها اني دخلت مووود الرواية لكن بردوا كان في اسهاب في الوصف …
اللغة والألفاظ تنساب من قلم الكاتب بسهولة وترتيب واتزان شئ رائع …
التشبيهات البلاغية قليلة بس لما بتحصل بتكون حلوة فعلاً مع تحفظي على الإستعارات البلاغية اللي لها إيحاء جن$سي ويمكن يكون الكاتب قاصده علشان يوضح شخصية الراوي في هذه اللحظة (جندي أجنبي) إلا أني مبحبش البلاغة من النوع دا … في المجمل العمل جميل والكاتب أسلوبه ولغته ممتازين لكن حجم الرواية أكبر مما تستحق فعلاً في احتياج حقيقي لاستقطاع أسلوب الاسهاب في الحكي
التقييم ولست أهلاً للتقييم
(#لقد_نجحت_الرواية_أن_تكون_عمل_أدبي_يحرك_العقل_والقلب_فيجازينا_بالمتعة )
ممكن تتابع كتاباتي وريڤيوهات الروايات والدراما والإخراج من الهاشتاج دا 🥰
#سينما_في_رواية
#محمد_محروس
الرواية موجودة على #أبجد