ان ثمن اكتمال الانسان باهظ جدا وقليلون من يتوفر لهم الوعي والشجاعة ليدفعوا هذا الثمن..
على الإنسان ان يوقف البحث عن الضمانات لنفسه ويغرف من الحياة بملء كفيه ويعانق الوجود، يتقبل الألم كشرط من شروط الحياة. عليه ان يساكن الشك والظلمة إنهما ثمن المعرفة.
وهو بحاجة إلى إرادة عنيدة في الصراع وعلى استعداد دائم لتقبل النتيجة حياة كانت ام موتا
موريس ل. وست
أحيانا كتير بيبقى الجهل مكلف ومتعب بس الأحيان الأكتر المعرفة بتكلف أكتر، هل أنت عندك استعداد تقف قدام نفسك في المرآة وتواجها بكل ما تعرف عن نفسك وغيرك؟
جرب بس ماتتخيلش أنك هتخرج كسبان أو هتخرج من أساسه.
كل ما أعرف هي رواية للكاتب علي قطب Aly Kotb وكانت أول تجاربي معاه في القراءة، أول مرة مسكتها حسيتها صغيرة نسبيا وأنا ما بضايقش من الروايات صغيرة الحجم نهائي، بس بعد شوية اكتشفت كمية من المشاعر والأحاسيس الموجودة فيها تكفي رواية من فصول كبيرة.
الكاتب كان عنده القدرة لمطها وتطويلها زي روايات كتير بس هو اكتفى بجرعة مكثفة من المشاعر والأحاسيس عشان تخرج بعد القراءة بتفكر هل المهم أعرف وأخسر ولا الجهل بالمخفي المؤذي نعمة.
الرواية ممكن نعتبرها رواية نفسية بجدارة بتخوض في أغوار النفس البشرية المضطربة أنا ممكن أكون بحب أشبه النفس البشرية بالبحر هادئ في أوقات ثائر في أوقات تانيه، مميت في بعض الأوقات وغدار في أغلب الوقت وأحنا هنشوف فيها الأنواع كلها.
الرواية بتبدأ بمحفوظ وعلي أولاد الخالة على قمة المقطم وكأن الكاتب بيشير لبداية السقوط المدوي من الهاوية ليهم ولأبطال القصة الأخرين وأبرزهم غدير زوجة علي اللي بيتهمها بالخيانة وبيؤكد لمحفوظ ده وهتتصاعد الأحداث وهيبدأ كل الأبطال يدفعوا تمن اللي هيعرفوه بعد كده.
الكاتب مقسمها لفصول صغيرة كل فصل بأسم واحد من الشخصيات واللي هيحكي الأحداث على لسانه طبقا لكل ما يعرف ولكن هل يعرف فعلا؟
ده السؤال اللي بتطرحه الرواية.
بتتقاطع خيوط المعرفة بالخيانة في الرواية اللي مجرد ما بنعرفها بتبدأ الأحداث في الرواية للتصاعد، لدرجة الغليان لحد النهاية.
اللغة سلسلة وفي نفس الوقت رصينة ومتمكنة وده اشيد بيه جدا للكاتب.
في نهاية الرواية هتسأل نفسك هل للمعرفة بأنفسنا وبمن حولنا ثمنا باهظا؟
وهل عدم المعرفة نعمة؟
وهاقوا أن
إذا كنت تعتقد أن التعليم باهظ الثمن، فلتجرب الجهل. ديريك بوك