الرواية : #امرأة_فى_الظلام
الكاتب: #رافاييل_مونتيز
عدد الصفحات : ٣٢٠
دار النشر : #العربي_للنشر_والتوزيع
ترجمة : #رانيا_الرباط
لماذا نجوت 🥺
ده سؤال يا فكتوريا ❓
هو السؤال " ازاى نجوتى " ‼️
ده انتى اتشحورتى يابنتى ومع ذلك قومتى
كبرتى على عقدة 🪢 وماضى لن ينسى
ذكرى مؤلمة لمقتل عائلة ، 🎂 ٤ شمعات انطفوا يوم ميلادك 🎂
ومعاهم انطفى النور فى عيون احبابك
وراح الأمان و ضاع معاه مستقبل قدام
ديه حتى ملحقتش تحفظ ملامحهم ولا تعرف طباعهم ..
طيب كنت تسيبها شوية تشبع منهم وتحفر ليهم ذكرى تونسها فى وحدتها…
وايه السبب للى حصل ❓❓
قاتل مجهول لا وكمان مهووس
، قرر يزور بيت 🏠 من البيوت ،
قتل الأم والأب … والابن راح يدافع نابه من القتل جانب
مفضلش غير " فيكتوريا " ، علشان تحكيلنا حكايتها بعد ٢٠ سنة من حادثتها …
لما فتحت فى يوم بيتها ولقيت رسالة على حيطة شقتها من قاتل عيلتها
يااااااا هو انت لسه فاكرها ما كفاية اللى حصل فى عيلتها
جاى بعد العمر ده كله تفكرها بحادثتها…
ديه لسه بتحاول تتعافى من صدمتها …
بعد ما سبتلها علامة لا يمكن تنساها
وبسببها بقيت جبانة فى طبعها وبصراحة حقها
ديه شافت بعينيها وسمعت بودنها
ده كويس انها عايشة وقادرة على حملها…
لكن للاسف ظهورك بعد مرور الزمن الزمها
تفتح فى دفاترها
وترجع لصندوق ذكريات عيلتها
املا فى الوصول للسبب
اصل مش معقول قتلهم كده هبل …
الحكاية وراها هدف ولازم يا فيكتوريا تعرفى السبب
وياريتك ما عرفتى ولا دورتى ولا دعبستى
مش كل المعرفة راحة …
الجهل أوقات بيبقى افضل استراحة
بس فى حالتك القاتل جر شكلك
وانتى كان سهل نكشك
اكيد كان نفسك ترتاحى
من تعبك وخوفك لسنين فاتت
بس الحقيقة الله اعلم بها
يا تبقى راحة يا تبقى صدمة ومناحة
ولا انتى خلاص اخدتى مناعة واتصابتى بالتناحة 🤦🏼♀️
رواية مؤلمة من اول لقطة ،
ديه جريمة مش عادية ديه جريمة وحشية …
سيناريو فيلم لازم يكتشف وانت بتقراها هتحس انك مشاهد … بتقرا الفصل وبتحس بشاشة كده نازلة بتجسيد المشهد فى عينيك بس خلى بالك ديه 3D يعنى احجز VIP seat 💺 علشان يهون عليك خضتك 😁
حقيقى رواية مظبوطة فى حبكتها واحداثها
مشوقة وسريعة وغير متوقعة والترجمة كانت ممتازة 👌🏻 والنهاية كانت ………‼️‼️‼️
بس خلى بالك هى رواية برازيلية الأصل فأكيد فيها بعض المشاهد والوصف +١٨ ولذلك قررت انوه احتياطى 😁
#مكتبة_دنيا
#قراءات_٢٠٢٢