كتاب خفيف وسريع ودسم لغوياً وفكرياً.. صفحات الكتاب 94 صفحة لكن هتسافر معاه جوه خيالك قبل خياله وتستمتع بالرمزيات الموجودة في كل قصة بشكل مرتب جدا.

الكتاب عبارة عن قصص قصيرة جدا مابتزيدش عن صفحة بالكتير لكن التكثيف اللي مكتوب بيه القصص بيخلي الفكرة ممتعة وسريعة لكن الجور الأساسي هنا إنه بيحطك في حالة من مشهد خاطف وده شئ مفضل بالنسبالي انا ولما الكاتب بيتقنه بيبقي شئ عظيم جداً.

الكتابات فيها تنوع وأختلاف أنت دايماً بتتعامل معاها لكن مبشوفهاش من زاوية الكاتب وده الغاية من القصص القصيرة أنك لما بتخلص قراءة أي قصة مبترجعش تشوف الحاجات اللي مةجودة حواليك طول الوقت بنفس النظرة قبل الكتابة.

عين الكاتب الفاحصة والشوافة اللي بتتعايش وتلقط من الطبيعة أو الجماد أو أي عنصر تقع عليه وتدمجه مع القصة أو تدخله معاك في حوار بلغة مختلفة دي مهارة مش سهلة لانها ممكن تخش في حيز رمزيات كتير من غير ربط متين يمتعك كقارئ ويشدك أنك مم أول حرف لآخر حرف وبعد ما تخلص بتفكر وتبتسم أنك وصلت لقصد الكاتب وممكن تفكر في زاوية تانية بعد ما الكاتب فتحلك سكة للتمشية في الحتة دي من دماغك.

الكتاب فيه عدد قصص كبير تقريباً بعدد الصفحات وأغلبهم فيه جميل تصلح اقتباسات من قوة بناء الجمل اللغوي أو دقو وتكثيف الألفاظ اللي بيعبر بيها الكاتب كأدوات حية وذكية في خدمة طريقة سردُه وحكيُه البسيطة.

طبعا مش كل القصص تستحق العلامة الكاملة في قصص كانت محتاجة توضيحات أو تلميحات أزيد لكن التكثيف هنا زي ما بيخدم في قصص زي ما ممكن يبقي نقطة غموض تحتمل كذا معني وده ممكن الكاتب يكون قاصده مش بمحض الصدفة.

الكتاب فيه عدد قصص مش قليل بيحمل لمحة كآبة او حزن وده بيبان من عنوان الكتاب وفن التخلي والتخفف من الاعباء بشكل عام علي جميع صورها سواء أشخاص او كراكيب نفسية أو حسية ومشاعر ملهاش لازمة وده بيبان في كذا قصة بلغة حوارية ذاتية هتخليك تسرح وتشوف نفسك جوة القصة بشكل ما سواء في الحوار أو في الرمزيات الي طول الوقت بتلعب دور أساسي في بناء القصة القصيرة وده بيرجع لكل قارئ وذكرياته وعاطفته الحسية والي هتستجيب وتنفعل مع كل قصة علي حالتها.

كتاب سريع وخفيف وينفع يبقي بين كتب دسمة أو بعد روايات مرهقة تقدر تعتبره زغزغة فكرية حزينة لكن ممتعة نوعاً ما وأظن أنه ممكن يتقرأ مرة واتنين وتلاتة وفي قصص احب اقرأها تاني وارجعلها سواء لبراعته في كتابتها أو لتعلقي بفكرتها أو بإنفعالي معاها زي ما في في كتاب العالق في يوم أحد اول كتاب اقرؤه للكتاب في قصص مازالت عالقة في ذهني لحد دلوقتي وبرجعلها من وقت للتاني.