رواية مزرعة الحيوان هي رواية قصيرة بتدور أحداثها داخل مزرعة ريفية في انجلترا اسمها مزرعة مانور، في يوم الخنزير الحكيم ماجور بيجمع حيوانات المزرعة وبيكلمهم عن حقوقهم وظلم مالك المزرعة الأدمي ليهم وبيبشرهم بتمرد هاينطرد فيه البشر من المزرعة وهايدير الحيوانات فيها المزرعة عشان يكون المحصول لأكلهم والبيض كله يفقس ويعمل فراخ وبط ولبن البقر يبقى لتغذية العجول. بعد خطاب ماجور بفترة بسيطة الخنزير الحكيم بيموت وبعدها بفترة كمان جونز صاحب المزرعة ورجالته الاربعة عديمي الفائدة بينسوا يأكلوا الحيوانات مما أدى للتمرد اللي تنبأ بيها عمنا المرحوم ماجور، وبعد التمرد الناجح اللي ادى لطرد جونز ومراته ورجالته بيتم اعادة تسمية المزرعة من مزرعة مانور لمزرعة الحيوان وبتبدي الأحلام الثورية الوردية الجميلة بجمهورية حيوانات مبنية عالمساواة والتفاني في العمل لمصلحة الجميع بقيادة اكثر حيوانات المزرعة ذكاءا الخنزيرين نابوليون وسنوبول لكن يا ترى هل الاحلام دي هايتم تحقيقها والدنيا هاتمشي تمام ولا الخلافات والاطماع ورفض المزارعين التانيين في المنطقة لفكرة مزرعة الحيوان هاينجحوا في هدم هذه التجربة الديمقراطية الوليدة.
اريك ارثر بلير المعروف باسم الشهرة جروج أوريل كان راجل يساري الهوى لكن مكانش عنده أي مشكلة في انه يبص على تصرفات القادة السياسيين المحسوبيين على الفكر اليساري في بلده انجلترا وخارجها ويقولهم على فكرة انتم شوية فسدة ومنافقين ويمكن عدم قدرته على التكيف مع هذا القدر من النفاق والفساد السياسي من اليمين واليسار والوسط وكل حتة كان من الحاجات اللي جابت اجله بدري زي بالظبط كده ما الاكتئاب النابع عن نفاق القيادات الحزبية اللي نطت على ثورة مصر في بداية هذا العقد جاب أجل ناس من شباب الثورة.
عمل جميل وصعب واسقاطاته على مية الطرشي السياسية اللي احنا عايشين فيها دلوقتي واضحة وضوح الشمس
اقرأ على مسؤوليتك الخاصة