فيه تريقة غريبة على فكرة إنه أحمد خالد توفيق -الله يرحمه – كانت كتاباته كلها سطحية ومالهاش أهمية أدبية قيّمة؛ زي كتابات ديستوفيسكي أو ماركيز عالميًا، ونجيب محفوظ مصريًا.. أنا مش فاهم لحد دلوقتي أصل الموضوع ممكن ييجي منين؟
هل عشان الراجل كان بيكتب أدب مراهقين؟ طب هو نفسه بذات عضمه لسانه قال إنه بيكتب كده فعلًا، وإنه نوعية ما يكتبه اسمها ’’أدب البوب ‘‘ وده مخصص للشباب أكتر منه للكبار، وأكتر منه أدب عظيم، مع إنك لو سألت حرّاس الأدب دول: يعني إيه أدب عظيم؟محدش هيعرف، ولا أنا أعرف، وحتى الدكتور في كتابه العظيم (اللغز وراء السطور ) يعرف.
والتريقة بتاعت السطحية والكتابة للمراهقين امتدت معاه وقالوا عنه لم يقدم شيء حقيقي، ولم يكتب سوى القصص المسلية بتاعت الأطفال والمراهقين، باعتبار طبعًا إنهم فحول ثقافة ومقطعين ورق الكتب من العرق!
المهم، الكتاب اللطيف للغاية ده: (اللغز وراء السطور ) واحد من أهم الكتب الأدبية اللي ممكن أي حد، أو ’’شاب ‘‘ يقراها في حياته.
الكتاب تقريبًا أهم رد على فحول الثقافة والأدب في إن الراجل لم يضف شيئًا قيمًا.
الكتاب قسمين، القسم الأول ماسورة معرفة أدبية خاصة وعامة، كمية من الآراء، والحكايات، المعلومات، وأسماء أدباء من كل أطراف الأرض وحكاياتهم مع الكتابة، وطرائف عنهم، وعن أسئلة طرحوها وكانت بتدور في عقولهم. قنبلة معرفة أدبية.
القسم الثاني من الكتاب مقالات خاصة ليه، عن الشعر والسينما والأدب وعلاقتهم ببعض، وعن مواقف وآرائه في كل ما يتعلق بالأدب. قنبلة متعة أدبية.
الكتاب أسلوبه مميّز جدا زي الدكتور الله يرحمه، الحكايات والمعلومات الكتيرة جدا فيه مكتوبة بشكل مباشر وبسيط وغزييير.
الكتاب يكشف الغطاء بكل سهولة عن إن الكاتب الفاهم هو قارئ نهم ممتاز وفاهم. الكاتب الشاطر بيبقى قارئ شاطر أوي. كمية من أسماء أدباء عالميين قرأ ليهم وترجم عنهم وبيحكي عنهم تخليك تقف احترامًا للراجل حتى لو كان أدبه أدب مراهقين، وإنت كفحل أدب تخطيت المرحلة دي!
أنا هنا مش بدّعي إنه ده كتاب لا يأتيه الباطل، أو إنه كتاب خرافي مالوش مثيل؛ لكنه كتاب بيظهر من وراه قارئ موسوعي ملم بأنواع وأشكال من الأدب العالمي قبل المصري كبيرة جدا.
وكتبت عنه؛ لإنه أكثر الكتب المظلومة للدكتور، عشان مش رواية وعشان مأخدش حقه الإعلامي أوي، بس هو ممتع جدا جدا والله.