كل ما أقلب ف التلفزيون ويكون الفيلم ده شغال بابا يقولى : سيبه ده من علامات السينما المصرية :D

فبقوم وأسيبه لحد ما جت الفرصة إني أشتري الرواية و قررت أخيرا أقرأها وكويس إني مشوفتش الفيلم قبل ما أقرأ الرواية

والحمد لله عجبتنى بعد 10 محاولات مع نجيب محفوظ

الرواية شدتنى جدا من أول صفحة و قرأت 100 صفحة تقريبا في أول قعدة خصوصا إنها بعيدة عن جو الفتوات بتاع نجيب ده

لكن بعد كده المنحنى بدأ ينزل و بدأت أمل م الرواية

و لكن ف التلت ألأخير بالتحديد أول ما حسنين نجح ف البكالوريا و بدأت الأحداث تبقى مشوقة تانى

عجبتنى جدا شخصية فريد أفندي و حسين

وسعادة البك : خصوصا لما قال إنه مبيقولش لأ لو حد جاله ف مساعدة و شعوره إنه في حد محتاجله بيبسطه جدا :)

و نظرة حسن للحياة و إنه إزاي فاهمها أوي كده

و كرهت حسنين وأنانيته وغروره

الحوارات الداخلية للأبطال عجبتنى جدا و عجبنى فهم نجيب لنفسيه كل شخصية

لكن معجبنيش أنه كرر على لسان نفيسه إنها دميمة أو مش حلوة معتقدش ان بنت ممكن تكرر الكلمة دي بالشكل ده او ان بنت تقول على نفسها مش حلوة

عجبتنى بردو النهاية برغم غرابتها

طبعا مش لازم أقول إن الرواية افضل م الفيلم عشان بتوصف نفسية الأبطال ف مواقف معينة و تفسرلك ليه البطل اتصرف كده .... إلخ

لكن أفضل ما في الفيلم هي الموسيقى التصويرية الكئيبة التى تتناسب مع كآبة الفيلم والرواية طبعا

مناسبة جدا لجو الرواية بس مقدرتش ألاقي ال track لوحده :(

ألقاك يا نجيب ف أول أجزاء الثلاثية في شهر فبراير إن شاء الله