للعلم انا من عشاق الحكيم وتقدروا تقولوا ان كتبه هي اللي هونت عليا سنوات الثانوية العامة التقيلة لأن مدرستي كان فيها مكتبة عامرة بروائع الأدب العربي ومنها كل كتب توفيق الحكيم فتقدروا تقولوا اننا أصدقاء قدام
كتاب ده بيحتوي على قصص قصيرة وخواطر ومحاورات بين توفيق الحكيم وبعض شخصياته
من اكتر القصص اللي عجبتني فيه قصة عدو ابليس وهي عبارة عن حوار تخيلي حصل بين ملك الموت وابليس بعد وفاة الرسول صلى الله عليه وسلم
كالعادة في اعمال الحكيم فيه فلسفة وجمل حوارية تقيلة تستحق الاقتباس ده غير انه بيلقي الضوء في بعض اجزاءه على شخصية الحكيم ونظرته لنفسه ولاعماله وشخصياته ودي حاجة مفيدة بالنسبة للمعجبين أمثالي