هكتب مراجعه عجيبة شوية:)
طول ما انا بقرأ الرواية كان مسيطر عليا هاجس واحد هو ازاى احمد حلمى هيعمل الدور:)
الرواية محبوكه بجوده شديده
واحمد مراد كاتب سينمائى رائع
فى الاول استغربت النهاية واللى كانت ان طه عايش حياته عادى بعد كل اللى عمله
رغم تعاطفى مع طه لكن القتل تم بدم بارد زياده عن اللزوم وكان لازم يتأثر وزى ما قالت عمته يموت شىء جواه
لكن مع ذلك فرحت فى اللى قتلهم حسيتها عدالة
ازدواجية انا صح:) مش بقولكم مراجعه عجيبة:)
بس لما فكرت شوية فى النهاية لاقيتها مناسبة لشخصية طه لانها شايف انه كده بيقر العدالة من وجهه نظره
يعنى خليك مكانه هو عارف ان حق والده مش هيرجع وان القانون مش هقر العدالة يبقى لا مفر من قانون الغاب
شخصية والد طه عجبتنى جدا مرسومه بشكل جيد جدا ومعقد
شخصية سارة الحقيقة ازعجتنى بشده مش عارفة ايه وجهه نظر الكتاب فى تصوير اى بنت بتتظاهر وبتعترض وبتشارك فى السياسة انها شخصية غير محترمه وضايعة اخلاقيا !!!
حصلت فى رواية انا عشقت برضه
ومش فاهمه الحقيقة ليه سارة كانت لابسة الحجاب اصلا هل ده مقصود وجزء من تعقيد الشخصية مثلا ..الله اعلم
جزئية اخيرة لهجه الكلام سوقية وبذيئة للغاية والالفاظ صعبة جدا
بحب جدا فى روايات احمد مراد تشابه بعض الشخصيات والاحداث مع الواقع واللى يخليك تفكر هل ياترى الكلام ده حقيقى وهو مقتبسه من الواقع ولا هى حيلة ماكرة منه عشان يشغلنا بالتفكير:)
لكن فى النهاية احمد مراد موهوب بشده وانا بحب اقرى له مهما كتب