واشمعنى مصر..الناس بتاكل روحها حاف

اشمعنى مصر..

شارع طويل كاشش على قد اللحاف

واشمعنى مصر..بتِلزمك حب الوجع

وبترسمك عيل جدع

وبتهزمك فقر وجشع.. تثبيت كتاف

واشمعنى مصر..بتلهمك صبر الجبال

وتبعترك وتلملمك..أخر جمال

وتريحك وتأزمك..وتكسرك وترممك..

وتخوفك وتوشوشك..اياك تخاف

واشمعنى مصر..ما تسألوش

أرض وبشر..قُدرة وقَدر

بالمختصر..مخلوقة تعشق الاختلاف

**~~**

بداية عشان الكتاب ده تحسه صح لازم تكون مصري

عشان تتشربه ويوصلك

لازم تكون نزلت بالبيجامة تجيب فول وطعمية من الفوال اللي جنبكو

و تكون رحت بإزازة الكوكاكولا الفاضية للسوبر ماركت اللي ع الناصية عشان تملاها تاني

وطبعاً تكون رحت تجيب عيش من ابو شلن -طبعا وانت صغير قبل الشلن ما ينقرض-ووقفت ف طابور

ولازم تكون لفيت في شوارعها وركبت تاكسياتها وميكروباصاتها

الكتاب روحه موجعة يخلي قلبك ينزف وروحك تتألم

وكل ما تدخل فيه أكتر كل ما تتشبع بالإحساس ده

برغم إن عندي تحفظات على خالد الخميسي واستغربت من هوامشه ، لكن كفاية ان له الفضل ف نقل الحكايات وف فكرة الكتاب

إنما المؤلفين الحقيقيين هما الناس الغلابة اللي بتحكيلك بمختلف وجهات النظر عن شقاها ومرارها وحزنها ونضالها عشان لقمة العيش

الناس دي برغم كل اختلافاتهم ، وبرغم ان بعضهم سيء الخلق والأفكار إلا إنهم بيجبروك على حبهم ، وعلى التعاطف معاهم ، والإندماج ف مشاكلهم اللي هيا مشاكلك ومشاكل اللي حواليك

متخيلتش إني هحب الكتاب كده ويدخل قلبي

من أكتر حكايات الكتاب جمالاً الحكاية التالية

وهي اللي ختمت الكتاب ورفعت تقييمه عندي من 3 إلى 4 نجوم

سائق تاكسي بروح لطيفة بيزرع جنينة صغيرة قدام بيته وبيقرا الكتب ويسمع الموسيقى وابتسامته دائمة وكأني شايفاها قدامي

الختام كان رائع بعيون خالد الخميسي

*~~*

ذلك الملاك الأسود ترك لى فى النهاية طعم السكر فى حلقى، ورائحة مسك الليل فى روحى، وجعلنى لأول مرة منذ زمن أفطر بتمهل ودون استعجال متأملاً كل شىء حولى

وجعلنى فى النهاية أحاول أن أجعل منزلى عشّاً كالذى وصفه. ولكن من أين لى بأجنحة كأجنحته؟

*~~*