بالرغم من إن قبل ما ابدأ قراءة فى الرواية دى كان فى تعليقات سلبية كتير جداااا عليها وحسيت إنى هاخرج منها بحالة إكتئاب وربنا حالة كره مؤقت لكتب د.أحمد خالد توفيق
لكن وبعد الإنتهاء منها الموضوع كان مختلف تماما !
لا أنكر إنى كنت مع كل فصل جديد فيها بدور على د.أحمد خالد توفيق
وكل شوية اشوف الغلاف علية اسمة بجد والا انا غلطانة
بعيدة تماماً عن أسلوبة فى الكتابة وأسلوبة فى الموضوعات اللى متعودين عليها منه!!
بس لو كنت ركزت فى النقطة دى كتير بالتأكيد كنت هاكره الرواية
ثانياً..فى بداية الرواية نظرت ليها بنظرة مباشرة ولكن بعد شوية بدأت أحس إنة مقصود بيها نظرة ابعد من اللى مكتوب هو بيتكلم عن حياه كاملة خلف الاشخاص اللى ذكروا فى الرواية
وارد يكون بيتكلم عن حال مصر فى صورة بعض الأشخاص وبيتكلم عن قاع مصر نفسة واللى بسببة اتفرجت الثورة
وارد يكون بيتكلم عن الحالة السياسية فى مصر فى صورة بعض الأشخاص بردو
ما هو أكيد يقصد حاجة تانية غير اللى مكتوبة بشكل مباشر كده وإلا بالتأكيد يبقى فى حاجة غلط!
حالة اشخاص الرواية حقيقية جداً وبالتالى مأسوية جداً
أعتقد إن أقرب الأفكار لقلبى كانت شخصية ابراهيم واللى خلتنى اتسائل هو عايش حقيقى والا ميت وبيحلم !
أما قصة عفاف هى كانت الأساس حتى فى الفكرة الرمزية اللى بتحيط الكتاب كلة
السنجة.. السرنجة.. السيجة..السرجة ..السبحة..أو حتى كلمة أخرى مختلفه تماما عن كل ده
ترابط الألفاظ ونظرة كل فرد ليها مع ربطها بمواقف كتير فى حياة عفاف تخليك تحس إن النهاية كانت بسبب وجود كل الالفاظ والمواقف دى فى حياتها وكأنها النهاية كانت محتومة وجاية مهما طال الوقت
وده خلانى بردو اشوفها من اتجاه انه بيتكلم عن مصر اللى مرت بمواقف كتير جداً يمكن تكون عدت وقتها لكن تراكمت حتى الوصول للنهاية المتمثلة فى الثورة
بالنسبة للثورة حسيت إن الجزء اللى ورد عنها مقحم إلى حد كبير!
وشخصية البلطجى الممثلة فى حماصة دورها مختصر جداً وصورة فى الرواية على إنه "البعبع"!
بالنسبة لبعض الألفاظ الخارجة لا أنكر إنها فاجئتنى فى البداية ولكن استطعت التغاضى عنها وكأنى لم أراها
الرواية صادمة بعض الشئ ليس لمضمونها الذى ربما يفتقد للقوة المطلوبة ولكن لأنها من د.أحمد خالد توفيق