إيه ده كله إيه ده كله إيه ده كله !
إيه اللى انا قريته ده ! بقى هى دى رواية لاحمد خالد توفيق ! حد يقول كلام غير ده ! مش معقول بجد ده لو واحد كاتب لسه مبتدئ ميكتبش نص بالشكل ده
السبحة ولا السنجة ولا السيجة ولا السرنجة ولا السرجة .. رواية بتجيب تشتت ف الذهن من كتر الشخصيات والاحداث اللى فيها واللى شايفاها من وجهة نظرى ملهاش اى لازمة .. حسيت وانا بقرأ الرواية ان المؤلف تعمد انه يكتر الشخصيات واكن ده هيخلى الرواية احلى وده طبعا كان ليه نتيجة العكس
حوار ان كل واحد شايف عفاف بطريقته .. مرة شغالة ف محل طُرح ومرة شغالة ف كوافير ومرة شغالة ف محل فراخ وكل واحد عامل يتخيل ويحكى .. الحوار ده فكرنى بحلقة من مسلسل راجل و6 ستات لما كان عادل ورانيا عاوزين يخرجوا ومش عاوزين حد معاهم من آل البيت فافتعلوا خناقة وكل واحد فيهم بيحكى اللى حصل من وجهة نظره وبشكل مخالف للتانى حتى رمزى لما جه حكى عن حاجة تالتة خالص .. ما علينا
كتر الشخصيات ف الرواية - واللى قولته قبل كده - خلانى من غير قصد انسى الشخصيات او انسى هى مين دى اصلا وكنت ف الاول برجع لفوق عشان افتكر بس من كتر الاحداث نسيت وده اثر ع درجة استمتاعى بالراوية ده لو ف استمتاع اصلا !
نيجى بقى للكارثة الكبيرة .. إيه لازمتها يا د / أحمد إقحام الثورة ف نص الرواية ؟ .. احنا لو شيلنا الجزء ده كلها ولا هيكون ليه أى تأثير يذكر ع المتن نفسه فإيه لازمته بقى ولا هو مجرد تماحيك ف اسم الثورة عشان الرواية تتقرى اكتر ؟!
بصراحة لما سمعت رأى كتير من الناس اللى بثق فيهم وف رأيهم ف الرواية دى قبل ما ابدأ فيها كنت فاكرة رأيهم مبالغ فيه بس لما قريتها بنفسى حسيت ان رأيهم هين عليها بجد
نجمتين فقط لاسم خالد توفيق ليس إلا