انا فاكرة الكتاب ده اول مانزل , كنت هموت واشتريه
وكالعادة طبعا , كانت توقعاتى ليه عاليه
خصوصا انى سمعت عنه كلام كويس كتير
630 صفحة
خلصتها فى يومين تقريبا .. مش اعجاب او حب
لكن فعلا كنت عايزة اخلص منه بسرعة
بالنسبالى علشان اقيم اى روايه بقسمها لفكرة واسلوب وهدف
الفكرة.. هنا كويسة يعنى الادمان ووسيلته
الاسلوب ..كان غريب جدا
اشبه بواحد بيكتب مذكرات عامى على فصحى
انا عارفه ان العامى هنا ممكن يكون اقرب للواقع
لكن الاسلوب الغالب مالوش ملامح اصلا
خليط مابين الرواية والسيرة الذاتية
الهدف .. لو اعتبرنا الهدف انه يخلى الشباب ماتنجرفش فى سكة الادمان
فكده هتبقى الرواية من غير هدف
لانى معتقدتش فى واحد كان ناوى يدمن مثلا وبعد مايقرا 600 صففحة هيقرر انه يرجع فى كلامه
لكن فكرة ال 12 خطوة وبرنامج علاج الادمان بالنسبالى اهداف رائعة بسمع عنها كتير لكن اول مرة اقرأ عنها بشكل تفصيلى
وبالتالى انا اعتبرت الكتاب عبارة عن جزئين اول 400 صفحة ودول حكاية ساذجة عن شوية شباب
وفيلم عربى كده عن ازاى بداوا مشوار الادمان
ده غير ان فى كمية شخصيات كتيرة جدا من غير سبب واضح
كأنه بيحسسك ان مصر كلها كانوا مدمنين !!
صفحات قرائتها مجرد تضييع وقت
والجزء التانى
كان تقريبا 200 صفحة , اللى كان ممكن اختصارهم طبعا فى 100 صفحة او اقل
بيتكلم فيها عن زمالة المدمنين المجهولين وبرنامج ال 12 خطوة
بالنسبالى كان الموضوع اشبه بالثقافة العامة اعترف انى استفدت منه
عوضنى عن ال 400 صفحة اللى من غير لازمة
كمان معرفة ان صلاح شخصية حقيقية , ده شىء رفع من قدر الرواية كتير
معرفش اذا كانت حياته ده حقيقيه ولا لا
ولو انى اعتقد ان جزء كبير منها من وحى خيال الكاتب
لكن مرحلة علاجه ورحلة نجاحة بعد الادمان طبعا حاجة تستحق التقدير
كنت اتمنى ان الكتاب يطلع بصورة افضل