المجموعة دي بتاخدك من أول صفحة لعالم تاني تمامًا… عالم مليان غموض وخطر وأسرار بتهمسلك وانت مش عايز تسمعها بس غصب عنك بتكمل زي ما النداهة بتناديك وانت مش قادر تقاوم
كل قصة فيها طابعها الخاص، وكل واحدة بتسيبك في حالة من الترقب والدهشة، كأنك لسه خارج من كابوس مش عارف إذا كان حقيقي ولا خيال!
القصة الأولى – شبح واشنطن
فكّر نفسك في نزهة بسيطة بالدراجة لحد ما الطريق ياخدك لبيت غريب، مفيهوش حياة، بس فيه حاجة تانية بتتنفس في الجدران!
جون رايلي يدخل البيت يدور على مساعدة، لكنه يكتشف إنه هو اللي محتاج اللي يساعده الجو العام في القصة مرعب جدًا، التفاصيل الصغيرة زي صوت الأرضية، والبيوت القديمة، والسكوت اللي بيكتم النفس… كلها معمولة بحرفية تخليك تحس إنك هناك فعلاً
القصة التانية – شبح رجل حي
رحلة في المحيط الأطلسي، وأجواء سفينة رايحة لمكان بعيد والبحر دايمًا بيخبّي أسراره
القصة دي فيها رهبة من نوع مختلف مش رعب مباشر لكن إحساس غريب بالوحدة والخطر وكأن الموج نفسه بيتكلم
حوار البطل مع مساعد القبطان غامض جدًا، يخليك تسأل نفسك: هو اللي بيحصل حقيقي؟ ولا مجرد هلوسة بحرية من الوحدة؟
القصة التالتة – صورة المرأة الميتة
دي من أجمل وأقوى القصص في المجموعة بالنسبة لي
مصور بيتجنب الحزن طول عمره لكن القدر بيحطه في مواجهة مع الموت نفسه من خلال الكاميرا
اللحظة اللي بيبدأ فيها تحميض الصور وتظهر الحقيقة المرعبة… دي لحظة صعبة جدًا ومكتوبة بإحساس عالي.د
الكاتب هنا لعب على فكرة إن الكاميرا ممكن تشوف اللي إحنا مش شايفينه، ودي فكرة مخيفة وممتعة في نفس الوقت
وغيرها من القصص المشوقة و المجموعة دي بتقدم رعب ذكي مش بيعتمد على الدم أو العنف لكن على الجو العام التفاصيل والخيال اللي بيخليك تتخيل الرعب بنفسك
اللغة بسيطة وسلسة جدًا الأحداث قصيرة ومكثفة ومفيهاش تطويل أو ملل
هتخلص القصة وتبدأ التانية وانت مش حاسس بالوقت وكل واحدة هتسيب جواك أثر مختلف
لو بتحب النوع اللي بيجمع بين الغموض، الرعب النفسي، والقصص اللي فيها نهاية مفتوحة تخليك تفكر المجموعة دي هتعجبك جدًا
مش كل باب مقفول وراه أمان أوقات وراه حكاية هتطاردك حتى بعد ما تقفل الكتاب
لو الكاميرا شافت اللي محدش بيشوفه… فهل فعلاً كنت عايز تعرف الحقيقة؟
ده مش كتاب عادي ده بوابة لعالم كل صفحة فيه فيها همسة من المجهول
اقرأها لو قلبك جامد… بس أوعى تسيب النور مطفي وانت بتخلص آخر صفحة
كل قصة هتخليك تبص حواليك مرتين قبل ما تطفي النور
كل قصة فيها حالة غموض مختلفة، وكل نهاية بتسيبك محتار بين الحقيقة والوهم
لو بتحب الإحساس ده بتاع الرعب الهادئ اللي بيتسلل جواك من غير ما تحس، فالمجموعة دي لازم تكون على قايمة قراءاتك الجاية
#أبجد
20 قصة أشباح حقيقية
Abjjad | أبجد
