جالفنيزم

قلم مختلف

له شكل مستقل

بتبدأ أحداث العمل بطالب جامعي متأخر علي احد محضراته وبيجري عشان يلحقها، والي كانت محاضرة للعالم لويجي، و بحادث بسيط بيحصل جوا معمل المحاضرة بيفتح جوا عقل العالم فكرة عن إحياء الموتي!

وعلي خط تاني بنشوف مذكرات مجهول، لرجل بيحكي عن معاناته في شغله الجديد وقد ايه دا مأثر علي نفسيته بالسلب لأسباب ما..

الرواية بتطرح عدة أسئلة زي ان مثلا في المقدمة بنشهد رجل جالس امام جثتين لأمرأة وطفلة في بركة ماية وبيتقبض عليه

مين دا وايه علاقته بالجثث وايه علاقته بالرواية اصلا؟

وهل هيقدر فعلا العالم لويجي من آل جالفاني إعادة جسم مات للحياة مرة تانية؟ ولا هيفشل؟🧐

⚠️ تصلح الرواية لمن هم ١٨+ لوجود مشاهد عنيفة، وبعض التلميحات الجنسية⚠️

انا من أشد المعجبين بقلم هيثم موسي، حقيقي هو مختلف وفي فترة قصيرة أصبح من كتابي المفضلين الي بنتظر اعمالهم من السنة للسنة♥️♥️

لغة العمل عربية فصحي سردا وحوارا، وجاءت اللغة السردية سليمة وسلسة كما عودنا الكاتب، ففي رواية أنتروبوفاجيا رفع من مستوي اللغة شوية كونها رواية تاريخية محتاجة ثقل لللغة، اما في عمل النهاردة بالرغم انه في زمن بعيد إلا انه نجح في صنع لغة خالية من التعقيدات اللغوية واستعراض العضلات لأن العمل مكنش محتاج دا.. وطبعا الحوار الي كان عظيم، ومؤثر في بعض الاحيان، عظيم لأنه مدروس مقارنة بكمية السرد ♥️

شخصيات العمل كانت تتمحور حول عائلة آل جالفاني، وتجاربهم المجنونة والمرعبة

احب أشيد بشخصية العالم الشاب (جيوفاني) الي اخذت منحني ممتاز في التطور، حتي نهاية العمل♥️

بالإضافة للشخصية الي كانت بتكتب مذكرات مجهول.. حابب اوضح ان السرد في الرواية من منظور الشخص التالت.. لكن في المذكرات من منظور الشخص الاول، ودا نقل احساس الشخصية والصراع الداخلي الي جواها، لأنه شغال في سجن بيتم فيه تعذيب للسجناء ويجب عليه المشاركة بطريقة ما في ذلك..

دا غير المشهادية العالية في أجزاء المذكرات..

وبصفة عامة المشهادية السينمائية مرتفعة في معظم العمل، ودا شيء الكاتب برده معودنا عليه

الكاتب عنده خيال جبار بيساعده انه لما يجي يكتب مشهد بيخليه كأنه معروض قدامك في شاشة.. وبالذات في مشاهد الخاتمة وفصول النهاية..

العمل شديد السوداوية، فكرة انك عايش في احداث بتتمحور حول إحياء الموتي لوحدها مقبضة

ما بالك لما يبقي فيه قتل وتمثيل بجثث وغيره من الأشياء الصعبة علي نفسية الشحص..

بالإضافة لأن العمل بيظهر الجانب الديني علي هيئة طائفة معينة ورد فلعها تجاه عالم بيحاول يعيد إحياء جسد ربه قبض روحه خلاص، وبنشوف ازاي هما بيدافعوا عن عقيدتهم..

في بعض المشاهد في الرواية هتعلق معاك، من اهمهم ((الخاتمة))، مشهد يقشعر له البدن..لكن مش من الرعب.. من شعور أخر مش حابب اذكره

وبمناسبة الرعب حابب اقول ان معدلاته مرتفعة جداا، علي قد ما هو بيظهر في شكل متقطع مش دائم علي قد ما ظهوره له تأثيره..

حابب اقول ان إضافة الصور في العمل كان قرار عظيم ومحمس اكتر للخيال ♥️♥️

في الخلاصة، رائعة جديدة تضاف لروائع هيثم موسي.. لو اول مرة تقرأ له اوعدك انك هتستمتع ولو قديم زي اخوك، فهتعرف قد ايه الكاتب كل عمل بيكتب في توجه مختلف، ودا معناه انه يحمل بجعبته الكثييير♥️♥️

كالعادة هيثم موسى بيقدم رواية جديدة مبنية على أحداث حقيقية في مزيج ممتع بين واقعية الأحداث بالإضافة إلى لمساته الخيالية والفنية اللي قدر يدهشني بيها بمنتهى البساطة وكل مرة في اتجاه جديد في الكتابة وإن شاء الله يكون موفق دايمًا..

بالنسبة لفكرة إضافة الصور أحييك عليها جدًا لأنها أضافت للعمل لمسة جمالية مفتقدها.في معظم أعمال الفترة دي..