اقتباسات من كتاب إن جاز التعبير

الحزن ده شبه البني آدمين

‫في حزن حقيقي بيملا القلب

‫وبيطفي اللمعة في نن العين

‫في حزن دفين

‫مردوم بتراب

‫أنا لسه قلبي عبيط

‫عشمان في يوم اللقا

‫وقصيدة متزوقة

‫مفهاش عبارة شجن

‫تسكن في أبياتها

‫وتبني فيها وطن

إحنا الفتافيت

‫وشظايا الدنيا المبدورة

‫على كل طريق

‫حاجة بتتجمع فبتكمل أكبر صورة

‫زي الموزاييك

‫زي الأطفال أما بتلعب ع الشط الرملي بجرادلها

‫زي الجنّية اللي تصيدك من نفس الشط بتفاصيلها

‫وتزوروا عوالم مسحورة

‫فيها مردة وجن.. وحراسها حبة عماليق

‫رافضين لو تدخل فتفوتة

‫حاطين ع الباب قفل وجنازير

‫وأنا واحد طافح للكوتة

‫مش هامه العالم ده بسحره

والكحل الباقي في نن العين‏

‫بيسيح من دمعي على فراقهم‏

‫ويقصقص أعظم مشاهدهم‏

‫وشريط الخام اللي حابسني‏

‫أتحوِّل للكاميرا الديجتال‏

بقى تحت العين حبّة تجاعيد

‫خطاط الوش مزيِّني

‫بخطوط كوفي وفارسي ورقعة

‫بتقول وتعيد

‫حواديت لسنين ملهاش راجعة

‫بتخبّي وراها كمان حواديت

‫قصة يوم جيت مفتون دايب

‫والقلب «الكومي» اللي اتحول فجأة لـ «شايب»

‫لكن جواه عيل طايش

‫سهران في شوارع قلبك عشق

‫مستني الفجر يقيد فوانيس

‫اللحظة الحلوة الـ «ماستربيس»

‫نفس الإحساس أما بتيجي في بالي لدلوقت

‫قشعرة الجلد

لو غايب أو ناسي ملامحك

‫الصورة ساعات هتفكرني

‫لكن يشجيني الصوت ازاي

‫حسّك في الدنيا مطمّنني

أنا سبت مع الوقت التدقيق‏

‫إني معديش‏

‫ييجي ألف صديق‏

‫تتخض.. تقول راجل بلا قلب‏

‫بيقول ياما فات في السكة صحاب‏

‫أنا سبت حاجات..‏

‫قبل أنا ما أتساب‏