مراجعات رواية طيف نجاه

الرواية خفيفة ولكن لها ابعاد فلسفية عميقة ، اسلوب الكاتبة بسيط و لكن القصة شيقة و اسلوب الكاتبة ساعد في ايصال مشاعر البطلة و معاناتها بشكل كبير ، في انتظار الاعمال القادمة من الكاتبة ان شاءالله

هو إحنا دخلنا حياة الكُبار إمتى؟!

إمتى بطلنا ندوّر عاوزين نبقى إيه ونعمل إيه؟!

إمتى بدأنا نخاف من التجربة ونسلم الدفة للناس اللي حوالينا؟!

رحلة "كارما" بطلة الرواية هي طيف نجاة حقيقي لكل شخص حاسس بالحيرة والوحدة.. وحاسس إنه أضعف من إنه يشارك ده مع حد..

عشت لمدة ٣ أيام بشوف الحياة بعيون شخص تاني..

نجاح كبير للكاتبة إنها قدرت تخليني أتلامس مع الشخصية لدرجة إني بقيت بسمع الحوار بصوتها..

خاصةً والبطلة بتعاني من إضطراب نفسي مش سهل التعبير عنه..

بلغة بسيطة وسلسة قدرت تدخلني العالم بتاعها ..

كنت بقف كتير جداً عند أسئلة الطبيبة النفسية "سارة" وبفكر في مخاوفي وأحلامي!

إختيار مُوفق جداً للإسم ❤️

رواية خفيفة وسلسة ورحلة ممتعة جداً قدرت تخطفني من يومي وحياتي جوا أحداثها ولقيتني وأنا بقفل آخر صفحة من صفحاتها حاسه كإني بودع صاحب عزيز شاركني قصته ورحلته في استكشاف نفسه بشغف وصدق حقيقيين و حسيت كإني أعرف كارما بطلة الرواية من زمان وكإني كنت بدور معاها على طيف النجاة طول الرواية ! حسيت كإني بتمشي في شوارع أسوان ومعالمها ودي حاجه قوية جداً من الكاتبة ووفقت فيه جداً لإن وصف الأماكن كان من أعظم نقط القوة في الرواية.