تلوم عليا ازاى يا سيدنا وخير بلدنا ماهوش في إيدنا
قولى عن أشياء تفيدنا وبعدها بقى لوم ليا..🤷♀️
هو احنا من زمان قوى فى كده…
يعنى مش بنعتبر
الحكام مش بيتعظوا
مش بياخدوا بالهم
مش عايزين يحصلهم زى اللى حصل لعبد الشكور واحد صاحبهم أكيد يعرفوه 😄
كل زمن وله حكامه
اللى بتغطى السلطة والنفوذ عينهم عن شعبهم واحتياجاته..
ليييييه لأ بجد لييييييه بصوت شوبير 🤦🏼♀️
ليه اللى المفروض يبقى حامينا بيبقى حرامينا
ويماين مع العدو ليه بيمشى حاله على حساب الشعب ليه هو مش برضه من الشعب ولا ايه
ليه بيبقى هو والعدو علينا
اندمجت قوى وبعدت عن الرواية اللى هتكلم عنها
بس يمكن اتخنقت شوية وقولت افضفض واجيبها فى الرواية 😄
رحلة عيشتها فى مصر الملكية وأيام الاحتلال البريطاني على مصر فى صفحات رواية #راية_جماعة_البك لـ #عمر_عماد_يونس
أغلب قرأ كتير عن الفترة ديه وحاسة بالشعب وقتها كان عايش فى ايه … كل واحد فينا فاكر زمنه أسوء من اللى فات بكتير هو سىء مفيش كلام 😄 بس فيه الأسوء كمان وكمان
تخيل تعيش على مزاج الغير هتقولى مع احنا كده كده عايشين متكدرين
هقولك مجربتش الاحتلال وبلاويه واللى كان بيجرا فيه… احنا حاليا محتلين بس مننا فينا 😄
لكن لما تبقى من الغريب أنيل بكتير 🤦🏼♀️
ما علينا نرجع للرواية اللى هتخليكم تجيبولى عيش وحلاوة ديه 😄
ايه اللى جمع بين ضابط 👮🏻♂️ انجليزي مع طفل يتيم و بكباشى سابق وراقصة فى كازينو الشانزليزيه على واحد كمان منضم لجماعة البنا وفهيم مش فاكرة كان ايه 😄🤔
مفيش شىء بينهم مشترك …. صح ولا ايه ❓🤷♀️
جماعة بتشتغل فى الخفاء لغرض واحد وهو التخلص من الاحتلال … هيعملوها ازاى 🤔
الرواية بتتناول فترة صعبة عدت على مصر … جنسيات مختلفة قاعدين متمركزين ما تعرفش مين فيهم معاك ولا عليك…
كله بيهاجم فى كله حتى اللى عاملين فيها فدائيين تحس أن كله وراه مصلحة غير …
الكل بيهتف وينادى بالإستقلال بس غرضه مصلحة شخصية ولا فعلًا نفسه يرتاح من الإحتلال…
جماعات بتلبس في بعض والاسم ايد واحدة ووقت الجد ماعرفكش 🙄
رواية مكتوبة بأسلوب حلو ولغة قوية شطارة من الكاتب أنه استخدم مصطلحات تناسب الوقت…
وعلى الرغم من صغر سن الكاتب إلا أنى انبهرت بأسلوبه وكنت فرحانة به.
جماعة راية البك هتحبهم وهتتكرهم فى نفس الوقت هتتعاطف معاهم وتشجعهم وساعات هتلعن غباءهم…
استمتعت بقراءاتها وعندى بعض الاستفسارات هبقى بقى أسأل كاتبها عنها 😊