شخص ما ينسخ جرائم قتل حدثت منذ خمسة عشر عاماً، لسبب ما 🤔
الطريقة نفسها
عنف مفرط لنحر العنق
قمصان النوم البيضاء نفسها
جوارب من النايلون
ربط اليدين والقدمين بالطريقة نفسها
نفس القضايا بتتعاد وكان مشارك فيها سيباسيتان وأورسولا وتوركل من سنوات
للى ما يعرفش مين دول
هقولكم ده فريق ريكسمورد للتحقيقات بس سيباستيان ده محلل جنائى وكان السبب الأساسى فى القبض على " هايند " القاتل المتسلسل اللى قتل الكثير من السيدات بوحشية والسبب هتعرفه لما تقرأ الرواية
مش ديه المشكلة
الفكرة أنه محبوس فى سجن شديد الحراسة
مقطوع عنه الزيارات والاتصالات 📞
يعنى مستحيل يبقى له يد فى الجرائم اللى دايرة الأيام ديه …
يمكن واحد من الفانز 🤷♀️ واخد " هايند " قدوة وحب يقلده ويتشهر شهرته فى الأخبار
ما هو أغلب القتلة بيحبوا الأضواء
يكتروا فى الجرائم ويجودوا فيها ويعلوا على بعض كمان …
لكن يلاحظ فريق ريكسمورد أن فيه رابط بين الضحايا من النساء المرة ديه
ايه هو يا ترى
وهل هيعرفوا مين اللى ورا الجرائم ديه
تانى جزء من سلسلة #المحقق_الجنائي_سيباستيان_بيرجمان #الرجل_الذى_يراقب_النساء من إصدارات #العربي_للنشر_والتوزيع
جزء ملىء بالأحداث والتفاصيل مش تفاصيل الجرائم بس لأ خالص احنا بندخل فى حياة كل شخصية فى الرواية حتى المحققين
تحس أنك بقيت جزء منهم وعارف روتينهم وعلى قد ما بتبقى مهتم ومستعجل تدخل فى تفاصيل الجريمة نفسها إلا أنك برضه هتبقى مندمج مع حياتهم وأسراراهم اللى مخبينها حتى عن أقرب الناس ليهم
مش معنى أنهم محققين يبقى هما أبرياء وماشيين مستقيم 😉 لأ دول مخبيين كتير كتير
حبيت الجزء ده بتفاصيله عيبه الوحيد
طريقة الطباعة يعنى مثلا هتلاقى حوار بين اتنين
فالطبيعى يبقى كل جملة فى سطر لكن هنا هتلاقى كل السرد ورا بعض فممكن يحصل لخبطة شوية مين بيرد على مين وبما أن هى رواية تقيلة ومليانة تفاصيل فمحتاجة تركيز وكان يفضل أن يبقى فى أريحية فى الصفحات بدل ضغط الكلام فى الصفحات.
وطبعا بالنسبة للترجمة، فترجمة هند حسنى ممتازة مش محتاجة اتكلم عنها 👌💙 متشوقة للجزء الثالث 😍 #مكتبة_دنيا #قراءات_٢٠٢٦