📚بتدور احداث الرواية في إطار نفسي واجتماعي حوالين المشاعر الإنسانية، والذكريات، وتأثير العلاقات على الإنسان مع محاولة طرح أسئلة عن الحب والخوف والوحدة والتغيير.
أسلوب الرواية بيعتمد بشكل كبير على الاقتباسات والمشاعر الداخلية للشخصيات أكتر من اعتمادها على الأحداث السريعة أو الحبكة المتماسكة.
💥للأسف الرواية ما كانتش على قد توقعاتي.
الفكرة نفسها كان ممكن يطلع منها حاجة أقوى بكتير، لكن حسّيت إن فيه مط واضح جدًا في الأحداث خلّى السرد بطيء وممل في أجزاء كبيرة.
كمان كمية الاقتباسات كانت مبالغ فيها، لدرجة إن بعضها حسّيته موجود لمجرد إنه يبقى “اقتباس حلو”، مش لأنه خادم فعلي للأحداث أو الشخصيات.
ولو اتشال جزء كبير منها، أعتقد الرواية ما كانتش هتتأثر.
وده غير الأخطاء المطبعية واللغوية الكثيرة اللي كانت ملحوظة جدًا أثناء القراءة، فحسّيت إن الرواية غالبًا ماخدتش مراجعة لغوية كافية قبل الطباعة والنشر، وده أثر على تجربة القراءة بشكل كبير للأسف.
كنت مستنية تطور أقوى وإيقاع أسرع، لكن التجربة بالنسبة لي كانت أقل بكتير من المتوقع.