عندي عادة سيئة متعلقة بالقراءة
اني ببدء في خمس أو ست كتب في وقت واحد و بقرأ فيهم بالتوازي فطبعا بتكون النتيجة اني بتأخر جدا في الانتهاء من جميع الأعمال 🤣
دا غير أن ابطال الأعمال بيدخلوا على بعض و احيانا بحلم بيهم بيتخانقوا سوا😂
بس الكتاب دا متفرد الصراحة و ملوش شبه
عامل كدا زي قطع الرافيلو وسط الشوكولاتات المتنوعة ... مختلف عنهم و ملوش مثيل.
بتكلم بجد و الله😁 اصل فين هتلاقي كتاب المؤلفة بتاعته كاتبة و زوجة سفير و خبيرة في الاتيكيت
و بتعرض لك بقى خبرات التلات شخصيات في بعض بين صفحات كتاب دافئ و في منتهى اللطف بأسلوب سلس كدا.
كتاب ( عزومة سفير) للكاتبة شيرين الألفي الصادر عن دار الرواق
يصنف ككتاب أدب رحلات بس هو مش مجرد وصف لبلاد وأماكن و خلاص، لا دا رحلة إنسانية مختلفة و مش متاحة لأي حد
خلال الرحلة دي هتقدر انك تدخل عوالم العلاقات الدبلوماسية والحياة الاجتماعية الراقية، لكن بدون تكلف مزعج ، و بروح شيرين الخفيفة اللطيفة الي قدرت تنقل لنا تفاصيل البلاد الي سافرت لها و عاداتهم و طرق تفكيرهم والفروق الدقيقة في الإتيكيت بين بلد و التانية و طبعا مع إضافة لمساتها و نصائح الاتيكيت بين السطور بشكل متسق مع سياق الحدوتة و غير مقحم نهائي
و طبعااااا مش عايزة احرق لكم المواقف و الطرائف الي اتعرضت لها شيرين في بعض العزومات.
زي طبق الرز الي وقع على دماغ ضيف الشرف من ايد السفرجي الغير متمكن 🤣
في النهاية الكتاب تجربة مختلفة و لطيفة جدا اتمنى تحبوه زي ما انا حبيته.
شكرا يا شيرين هانم 😍