النهش

خليني أقول في الأول أن دي القراءة الأولي ل رواية من كتابة الكاتبة شيرين هنائي ، من غير استغراب قصدي رواية كاملة بعيد عن لاشين.

تاني حاجة تتقال ، الرواية دي مستحيل أقدر اتكلم عنها من غير تفاصيل و حرق لكن هحاول اتكلم و اقول اللي في نفسي لكن من غير ما احرق عشان ده واحد من الاعمال اللي يستحق ان نقعد و نقرأ المكتوب بين سطوره.

أول حاجة في العمل كانت مختلفة هي مكان الاحداث اللي في حلايب و شلاتين ، و عن نفسي مش عارف هل فيه اعمال كان سير الاحداث فيها في المنطقة دي قبل كده ولا لا.

تاني حاجة مختلفة هو النوع الأدبي ، النهش رواية بتنتمي ل أدب الكوارث و الاوبئة نوع موجود في الأدب الغربي اكتر و بما أني جبت السيرة فاثناء القراءة حسيت أن دي النسخة المصرية من الموتي السائرون لكن بشكل مختلف و أخطار مختلفة و وباء مختلف ، لكني بقول ده عشان هاتكلم عن النهاية شوية انا فاهم و مقدر أن النوع ده صعب يبقي له نهاية سهلة او حتي نهاية ترضي كل قارئ للرواية لأنها محتاجة مساحة كبيرة و اجزاء متعددة مع خطر الوقوع في فخ الملل و التكرار.

النهاية وقفت عندها كتير و رجعت بصيت عليها تاني بعد ما خلصت قراءة و بصيت علي الريفيوهات و اتكلمت فيها مع اصدقائي ، واعتقد لو كانت النهاية خفينا فيها رمزيات شوية كانت هتبقي مرضية بالنسبالي اكتر.

نرجع للشخصيات ، معلش اصلي النهاية مجنناني لحد دلوقتي 🫣😇، امتياز في رسم الشخصيات و توظيفها في سير الاحداث ، حتي الكلب حواوشي حسيت باهميته و ان له تأثير و حضور في الاحداث.

العمل كمان قدر يطرح مشاكل كتير عجبني طريقة تناولها و مش هاقول هي ايه عشان ماحرقش. 😁

النهش واحد من الأعمال صعب نسيانها ، صعب القارئ يبطل تفسير الرمزيات و الإسقاطات ، ورغم جنون الأمنية و الخوف من فكرة الجزء التاني الا أني اتمني يكون في النهش ٢.