الرواية دي من الروايات الي كانت رفيقة جلسات العلاج في شهر يناير و نسيت خالص اعمل عنها ريفيو مع انها عجبتني جدا
مذكرات كاتب رعب الصادرة عن دار نوفا
الكاتب أحمد محمد علي
هي رواية قصيرة نسبيا و دا مناسب ليا الفترة دي عشان انا مشتتة جدا و معنديش طاقة اقرأ روايات طويلة
انا فاكرة كويس اني دخلت في حالة من الانسجام داخل العوالم الغرائبية اللي خلقها أحمد
طول الوقت وأنا بقرأ كان فيه سؤال بيلاحقني: يا ترى إيه اللي هيحصل لحلمي شتا كاتب الرعب الشهير؟
وإيه علاقته بأدهم وياسمين؟
و عرفت من مصادري الخاصة أنه اسم حلمي شتا مشتق من اسم كاتب الرعب الزميل حلمي مطر 😂
و دا يخليك تخلي بالك و متزعلش احمد عموما عشان متتحطش بطل في قصة رعب 🤣( احم بهزر)
دي أول تجربة لأحمد في أدب الرعب بعد تجارب متعددة وجميلة في أدب الجريمة و بيذهلني عموما الكاتب الي بيعرف يتنقل بين اكتر من genre
و حبيت إنه ما اعتمدش على الرعب المباشر قد ما لعب على إحساس القلق والترقب يعني انا مبحبش الوصف الكتير في الرعب مبحبش حد يوصف لي الشبح شكله ايه مثلا ف كان لطيف أن مكنش في وصف كتير
بجد تجربة ممتعة و موترة في نفس الوقت و ربنا يسامحك يا استاذ أحمد 😅