-مجرد رغي مش مراجعة.
• شخصية "تشاندلر" في مسلسلي المفضل friends هي الشخصية المفضلة ليا. ذكي ومُضحك و داعم وعنده شوية مشاكل كدة بيتعامل معاها بالسخرية والنكت - ورغم اختلاف الثقافات بس كنت بحس إنه شخصية تحس بالارتباط بيها بسهولة بصرف النظر انت مين او من فين - يمكن ده كله كان ميكس غريب بس مع ذلك كانت شخصية تتحب وخفيفة.
• هنا هاتتفاجيء إن "تشاندلر" ده الجانب الخالي من المشاكل من "ماثيو بيرى".. الجانب اللي كان عنده مشاكل مع أهله وفي علاقاته عادية جدًا على عكس الواقع البائس ،وكان عنده اصدقاءه وشغله الناجح فيه جدًا وده حسب كلامه كان عنده في الواقع.
مدخن شره و بيخاف من الارتباط بشكل مرَضي وبيضحك على آلامه وعقده وعنده مشاكل جدية مع والديه بالذات- في المسلسل وفي الواقع (طبعًا بشكل يخلو من المرح وأكثر بؤسًا)-.
تشاندلر ماكانش شخصية بيمثلها! كانت شخصيته هوا وجزء منه.
• ماثيو بيري كانت له كام ذكرى هما اللي حددوا مسار حياته :
-مشهد هجر أبوه له هو وأمه في عُهده جدّه وانطلاقُه يشوف مستقبله وحياته.
- انشغال أمه عنه دايما (كانت العائل الوحيد له) وشعوره دايما إنه محتاج يعوضها عن شيء ويسعى دايما لإضحاكها.
- إن أهله تركوه يسافر وحده من كندا لأمريكا بالطائرة وهو طفل 5 سنوات فقط!
•كل ده أثر عليه بشكل خلاه دايما خايف من إنه يُترك وحده، فكان أول ما يحس إنه حبّ حد يبادر هوا بالهرب قبل ما يتم هجره.
إحساسه دايما إنه لازم "يؤدي" و يضحك الناس عشان يشوفوه أو يتقبلوه ويحبوه.
إحساسه الدائم إنه غير كافي، وإنه لازم يبقى مشهور عشان يتشاف ويملى الفراغ اللي بيحس بيه ومايبقاش وحيد.. كان فاكر إن الشهرة هاتعالج كل مشاكله ولكنها زادتها سوءً.
إحساسه إنه محتاج يشعر بالتعلق بشيء أو بشخص يوجهه.. أكتر من "صديق" كانوا كدة بالنسبة له لحد ما يتضح إنهم بيستغلوه بشكل ما ويحصل خلاف- أو حتى مجرد قطع علاقات بدون سبب - فيقرر يتجه لتاني أفضل وأسوأ حاجة بالنسبة وبشكل جنوني وهي المخدرات والكحول والتدخين.
• أعتقد لو هايبقى في درس مستفاد من الكتاب غير تقدير المعاناة النفسية هايبقى أهمية وخطورة تأثير الأهل على أبناءهم.
أهمية معالجة أسباب المرض النفسي بدل محاولة دفنها أو الهروب منها بأي شكل من الأشكال.
مع ماثيو الموضوع كان اكستريم جدًا.. من تعافي لا يدوم لأكثر من عامين لانتكاسة بشكل متكرر على مدى 30 سنة! حاجة في منتهى البؤس.
• مش قادرة أتخطى البؤس في حياة أكتر شخصية بتضحكني في مسلسلي المفضل.. وغالبًا عمري ما هاشوف تشاندلر تاني من غير ما يصعب عليا واتأثر بدل ما أضحك.
والمحزن أكتر إنه في نهاية الكتاب كان يبدو إنه تعافى مرة تانية بشكل أفضل من أي مرة سابقة ،ولكنه مات بجرعة زايدة من دواء مضاد للاكتئاب بعد نشر الكتاب بسنة تقريبًا 😭💔
