دايما بعتبر #المجموعة_القصصية حاجة كده زي الواحة اللي بيرتاح فيها #القارئ من الأعمال #الروائية و #الكتابية التقيلة و ممكن يقرأها جنبهم و كمان بتعالج #بلوك القراءة بالذات لو مكتوبة حلو و موضوعاتها تلمس وتر الإحساس عندك و تعزف عليه .

الفترة اللي فاتت قرأت المجموعة القصصية ( من أعطي الصبي لفافة الحشيش ) اللي بتتكون من 13 قصة قصيرة أغلبها بيتناول مواقف حياتيه واقعيه سردها الكاتب بإسلوب سلس يخلي القارئ يحس كأنه قلب الحدث و شايفه رؤية العين و أجاد وصف المشاهد اللي فيها وصف للطبيعة و تجسيدها بطريقة مرنه سهلة من غير تكلف و ده اللي حيخليك في بعض القصص اللي فيها مشاهد زي البحر و الفجر و الغروب تحس بيها كانك جوه المشهد و تحس بوجود بالبحر و تسمع صوت امواجه و تشم رائحة نسيمه .

المجموعة ككل حتلاقي فيها مشاعر متواتره بين الرضا و الحنين و الالم و الضياع و الدفء و التحدي و الفرح و الحزن و الاستسلام و ده اللي خلاها مجموعة قصصية بتنبض بالحياة و تخلي قارئها يتفاعل معها بمشاعره و يشعر بصفعات الدنيا و حنوها علي بطل كل قصة فيهم ده غير إنها تصلح كـ #قراءة لجميع الاعمار و جانب الحكم الدنيوية فيها مبسط و حلو و مستساغ جدا و عموما المجموعة كلها تخلص في قعدة #قراءه واحده .

القصص اللي أعجبتني جدا بالترتيب :

ـ كرسي في الشرفة .

ـ حي الغرباء .

ـ فن تجريدي .

ـ دفتر الغياب .

- فقيه في البلاد المغيبة عقولهم .

- بركة .

ـ من أعطي الصبي لفافة الحشيش .

ـ لماذا لا تعطيني الدنيا ما أريد .

ـ العم حسن النوبي .

- كتيبة 606.

- عبور الأمل .

بس للاسف حستبعد آخر قصتين ( الفنجان الأخير ، بقعة علي حذاء ) و ده بسبب الاخطاء اللغوية اللي فيهم بالرغم من إنهم جيدين كفكرة و ده اللي استغربته لأن باقي القصص سليمة لغويا و جيده جدا و لكن علي ما يبدو إن دي غلطة #دار_النشر إنها معملتش تحرير و مراجعة و تدقيق لغوي ليهم و دي للاسف من الأخطاء الشائعة لبعض دور النشر اللي بتضيع بسببها مجهود و تعب كتير من الكتاب الشباب.

في النهاية احب اهنئ #كاتب المجموعة القصصية مؤمن خضر علي موهبته المتميزة و أقوله كمل و مستني منك الافضل بإذن الله وبرضه اقول شابوووووه كبير للموهوبة الفنانة حورية الجمل رسامة الغلاف و اللي فعلا بصمتها الفنية الجميلة و المتميزة بقيت اعرفها علي كل غلاف هي بتقوم برسمه و تصميمه .