في البداية .. لو كنت عزيزي القارئ الجميل ناوي تقرا النهش على انها بس رواية رعب تقليدية بتتحول فيها بعض الكائنات اللطيفة الى كائنات مفترسة .. فا احب اقولك ان مش هو ده الموضوع .. مش ده الموضوع خالص

النهش مش رواية رعب .. النهش رواية عن الفقد .. عن الاغتراب .. عن الادمية الي اتسلخت من فوق نفوس وارواح البشر وحولتهم الى حيوانات مفترسة بينهشوا في اعراض بعض وفي ارواح بعض

بتستمر شيرين في المنهج الجميل الي انا شخصيا بحبه .. والي اتبعته في حلقات الموسم الاخير من بعد منتصف الليل.. استمرت في انها تولد الخوف من حاجات قد تبدو في الاول عادية .. او تبدو للي بيحاول يفهمها كئيبة او حزينة او مقبضة وبس.. لكن لو قررت انك توسع خيالك شوية وتفكر في الي ورا الحاجات دي .. هتكتشف ان مفيش حاجة اكثر اثارة للخوف من الحاجات الي بقت تبدو " عادية " و ان النهش مش بس فعل حيواني قاسي و مؤلم.. لا ده فعل بشري مرعب .. فعل هيحول مجموعة من الكائنات المسالمة المدجنة الى كائنات غاضبة .. ساخطة .. وان لو ما خدناش بالنا من ده فمحدش فينا هينجو من اثره .. لا صوفية الي عاشت عمرها بتتنهش من كل الي حواليها وهي مكسوفة تقول لا .. ولا ياسر الي عاش عمره منهوش عشان صوته عالي وبيعرف يقول لا .. ولا ميكيل الي عاش عمره بيحارب النهش و يحاول ينجو منه بالهروب ..

شخصيات الرواية في غاية الوضوح والواقعية .. شخصيات ناس هتشوفهم حواليك في كل مكان .. ويمكن تتعامل معاهم بشكل يومي .. بل ويمكن تكون انت واحد منهم ..وده في حد ذاته هو قمة الرعب بالنسبة ليا .. خصوصا لما تشوف مصائرهم في النهاية

الجو العام لمكان احداث الرواية مرسوم حلو جدا ومرسوم بطريقة تخليك تعرف تتعايش مع الاحداث كأنك في المكان .. وده الي يخليني ارفع القبعة لشيرين لانها ذاكرت كويس اوي.. وانا شخصيا احب الكاتب الي بيذاكر و بيجتهد في مذاكرته

النهش فعلا رواية مكتوبة حلو .. محبوكة حلو .. مرعبة جدا جدا برغم ان الرعب فيها مش هو سيد الموقف ابدا

#النهش