في اتجاه في كتابة الروايات ممكن ما يكونش جديد قوي وهو الكتابة المشهدية للرواية ورغم وجوده من فترة طويلة، لكن دايما الرواية السينمائية بتواجه هجوم من تيار أنصار المألوف في الأدب، وأي تغيير للشكل التقليدي في الرواية بيتم التقليل من كاتبها، ويقولوا أنه بيكتب بأسلوب ركيك، وبيتجاوز في الألفاظ، والمشاهد خادشة للحياء، و و و وغيرها من الاتهامات المعلبة، بس يمكن اللون ده من الكتابة هيرجع تاني بقوة، وأعتقد أن السبب الرئيسي في عودته هيكون أمير عزب؛ لأنه يحسبله أنه بعد عن الشكل التقليدي للرواية المشهدية واختار القصص القصيرة السهل هضمها لجميع متعاطي الأدب.
وقصص كتاب "طرف صناعي" كانت خليط بين الكتابة السينمائية وقليل من السرد الروائي، وطول الوقت هتحس أنك بتتفرج على فيلم سواء عجبك أو مش عجبك هتكمله للآخر، بس أنا عجبني خمس من ست قصص وكلهم فيهم فلسفة واضحة بتدور حولين الفقد وكلنا بنحتاج الى طرف صناعي نعول عليه فقدنا سواء كان الفقد ده أب أو حب أو أبناء أو عمر ضاع أو وظيفة أو جزء من الجسد.
وعشان محرقش القصص هختار أسماء حركية للقصص علقت معايا، مش الأسماء الحقيقية خالص ومش هيفهمها غير اللي قرأ القصص يعني عجبني:
قصة الحيزبونة مرات المدام: مكتوبة بفلسفة عالية وليها مغزى عميق بين الزوج والزوجة.
قصة نور والراجل العجوز: مكتوبة بمشهدية عالية كأني شايفها صوت وصورة، ورغم أن نهايتها كانت متوقعة بس عجبتني وتابعتها للآخر.
قصة الجني الحكيم: رغم أني مش بقتنع بالكلام عن الجن وتحضير العفاريت والكلام ده، وبشوف أن عالم الجن ولا ليه أي لزمة؛ لأنها أساسا كائنات ضعيفة جدا ولا بتعرف تعمل أي حاجة في الدنيا وبتخاف كمان من البني آدمين، واللي شغالين في الموضوع ده هما أكتر ناس عارفين الكلام ده، وما فيش حاجة اسمها مردة وأعمال بتاثر في الإنسان، بس بيضحكوا على الناس عشان يفضلوا يسترزقوا من ورا المغيبين. بس كلام الجني في القصة كان عاجبني بصراحة واعتبرته إنسان عاقل بيقول كلام كله حكم، ده غير أن في فلسفة حلوة من ورا القصة.
قصة غابة القرية الذكية: مكتوبة بمعلمة وتعتبر أجمد قصص المجموعة.
قصة ضاعت أحلامك يا صابر: فيها مزج رائع بين الحقيقة والخيال جامد جدا، وتستحق تكون المجموعة كلها متسمية على اسمها.
المجموعه جميلة جدا وأعتقد أن اسم أمير عزب هنسمعه كثير الفترة الجاية 👏🏻
#مجرد_رأيي_في_كتاب_قريته
#محمد_عبد_الحميد
