مين قال أن المرض العقلي عار

نتحرج منه ونخبي مريضه عن الناس

لو حالته تستلزم علاج

نعمل اللازم زى ما بيقولوا الأطباء

لو حالته خفيفة ومحتاج مجرد اهتمام

وملاحظة على الخفيف مش حبسة فى البيت

يبقى نعمل كده ونحوطه ونراعيه ونخفف عنه هلاوسه ومخاوفه اللى ما بتنيمهوش الليل

فى كتاب 📕 #فلسفة_الجنون من إصدارات دار #الرواق_للنشر_والتوزيع و اللى كاتبه مؤلف ✍️ مجهول وكان فى الأساس مريض ونزيل فى إحدى المصحات العقلية لعدد من السنين حتى تعافيه

ايه ده هو المريض العقلي بيتعافوا منه

تخيلوا آه 🤷‍♀️

ما هو احنا واخدين انطباع غلط عن الجنون زى ما الكتاب بيقول واسمحوا أقول كلمة " جنون " فى الريفيو كتير لأن ده الاسم اللى استعمله صاحب الكتاب طوال كتابته للسطور

الجنون درجات زيه زى أى مرض

بيبدأ بملاحظات بسيطة لو ادتها اهتمام هتلحق تتداركها وكله غالبا هيبقى تمام

لكن لو تم التعامل معاها باهمال وبالحبس والتقييد ودخول مصحات غير مؤهلة لرعاية مريض

يبقى يا لطيف وربنا مع المرضى واهلهم كمان

الكتاب مبسط فى المعلومات هو مش عايز يدخلك فى ايه اسباب الجنون اتكلم عليها يمكن بشكل سريع

يعنى حاجات ممكن تكون بذرة الجنون

زى امراض وراثية - عادات غذائية - التدخين وتأثير التبغ على صحة العقل - التعصب الدينى ( مفهمتاش قوى عدت الفصل ده كتير 😄 اللى فهمته الضلالات الدينية والتشدد ممكن يأدوا للجنون)- صحة الجسد وتأثيرها على عمل وكفاءة العقل

( معلومات صحية وادى ايه اهتمامنا بصحة اجسادنا ممكن يساعد فى تحسين نشاط عقولنا وأن المعدة سبب لأغلب البلاوى فنلم نفسنا بقى وبلاش عك 😄)

وبعدين اخدنا الكتاب فى أن المصحات ممكن تبقى سبب للشفاء وممكن تبقى نقمة على النزلاء

من نظافة المصحات والاهتمام بمعايير الامان

وتنظيم المكان وفرشه بما يناسب المرضى كأنهم فى بيوتهم

والفصل بين انواع المرضى وفهم كل حالة على انفراد مش تجميعهم فى مكان واحد وخلاص لان فيه حالات تستلزم المتابعة والتواجد المستمر معاها وفيه حالات بتبقى بتمتثل للشفاء فاختلاطهم مع الحالات الخاصة الخطرة ممكن يعطل عملية شفاءهم

وذكر كمان تلاعب بعض المنشآت الصحية واهمالهم فى الخفاء ومدارة مصالحهم الشخصية وطبعا هيبقى من الصعب اكتشاف الامر من المراقبين ( بمعنى تانى هل لو اشتكى نزيل او مجنون زى ما الكتاب بيقول ) من سوء المعاملة هتصدقه ولا هتصدق صاحب المنشأة 🥺

و اتكلم كمان عن وضع بعض المرضى ذوى الحالات الخاصة فى دور الإيواء والإعالة أو مصحات عامة وهى مؤسسات غير ربحية من قبل المصحات الخاصة لمجرد التخلص من عبء حالتهم.

ندخل بعض كده على مواصفات الشخص المناوب على المرضى - و أن ضعف أجورهم بالرغم من صعوبة عملهم ممكن بخليهم يتعاملوا مع مهامهم وواجباتهم بإهمال فالأولى أنكم تهتموا بمقدمي الرعاية لأن دورهم مش هين.

دور الاعمال البسيطة اللى تقدر تشغل المرضى بها ووسائل التسلية والترفيه وتأثيرها على العقل أنها تلهيه عن وساوسه وازاى أن القراءة الخفيفة بتساعد على الامتثال للشفاء

النوم بشكل كافى وفى مواعيد مظبوطة ونوعية الطعام وتأثيره.

وفى النهاية حاول المؤلف ( المتعافي من الجنون ) أنه يقدم شكر وعرفان بالجميل للمصحة اللى قضى فيها سنين فـ ادانا تقارير حول المصحة وشهادات من مرضاها على مدى امانتها وتفانيها فى معاملة المرضى

حتى بين نزلاء الجانب الشرقى ( الأقل تكلفة فى الإقامة) والجانب الغربي ( المرضى من الطبقة العليا) لا يوجد تفرقة فى المعاملة.

رحلة جديدة عليا قضيتها مع الكتاب وبالرغم من بعض الصعوبات اللى واجهتها فى فهم بعض الفقرات بس ما ملتش خالص من الاعادة فى القراءة مرات ومرات نظرا تبعا أن الكتاب لغته ومصطلحاته علمية وفلسفية شويتين 😄 لكن الترجمة كانت موفقة 👌بما يتناسب مع وقت الكتاب والمفردات المستخدمة شكرا على ترجمتك #ماريا_ألفي عيشت فيها مع المؤلف وحسيت قد ايه هو شخص مثقف ورزين وماتخيلتش أنه فى يوم كان مريض 😊

رغيت كتير بس أصلي حبيت الموضوع قوى 😄

#مكتبة_دنيا

#قراءات_٢٠٢٦