يا حزن الحزن، من اسمها وانا متوقعة النهاية الحزينة والله، ولكن برضو تستحق القراءة
اول مرة اتعرف عالأدب الكردي، التاريخ المليء بالصراعات والحروب لابد وان ينتج النوع ده من الأدب الشاعري الحزين الآسر
القصة فى مجملها تبدو وكأنها تنتمي لعالم الخيال والممالك البعيدة اللي فيها الاميرة رائعة الجمال عايشة فى قصرها العالي والخطَّاب الفرسان بيتنافسوا على رضاها وحبها، ومن أجل مسعاهم النبيل بيلفوا العالم ويجوبوا البلاد عشان يجيبوا مهرها الفريد.
هكذا تبدو القصة فى البداية، بعدين تاخدك السنين والاحداث فى معارك وصراعات الاهالي والاحزاب، فى محاولة من الكاتب لرسم صورة لمحاولات بعض البشر البائسة فى ان يحيوا حياة حالمة وسعيدة ويستمتعوا بالحب والجمال فى مستنقع الكراهية والاطماع والحقد والغُلب اللي مغرق بلادنا، وتحديدا كردستان، بلد الكاتب
الكنايات المختلفة فى القصة دي حقيقي بديعة، الطيور ورمزية الحرية، تغريداتها اللي بتعلى وتخفت تبعا لقصة صاحبها وشخصيته ومصيره، البوم الصور ورمزية الآمال والاحلام الجامدة جوه عقلنا وخيالنا ومش قادرين نعيشها حقيقي وبصورة حية، الحمامة البيضا ذات النقطة الحمراء وكاميراني سلمى، كاميراني نفسه اللي يعد فى الرواية هنا مثال على كل محاولة اصلاح بيتم تدميرها
كل شخصية من التلات خطّاب كان مرسومة بعناية، بالذات منصور وصراعه مع التوقعات والامال المعلقة عليه والتناقض بينها وبين شخصيته ورغباته الحقيقية وصورته قدام نفسه. وخالد آمون وطباعه القاسية اللي فشل الحب والسفر والزمن فى تغييرها، والمصائر واقعية مناسبة لحامليها جدا، برغم الحزن المخيم على اغلبها.
قرأت الرواية مترجمة للغة العربية، ترجمة رائعة جدا، وان كان فى سقطتين مش عارفة ده خطأ فى التحرير ولا فى الرواية نفسها
الاولى: كانت فى نهاية الفصل ال ٣٤، لما قال ان منكوري باباكوره سافر ايران وكانت تلك اخر مرة يظهر فيها وانه بقى مختفيا عن الانظار حتى بعد انتهاء الانتخابات
لكن فينا بعد بيظهر منكوري باباكوره تاني وبيشاؤك فى الحياة السياسية وبيقابل كاميراني بعد رجوعه حتى كل اسبوع
الثانية: كانت فى الرسالة اللي أرسلتها سوسن لخالد آمون بتبلغه فيها برفضها الزواج منه، وبقرارها انها مش هتتجوز ولا واحد منهم، وقررت انها هتختار حد برة دايرتهم هم التلاتة عشان تتجوزه وتعيش معاه
لكنها بتكون فعليا اختارت واحد منهم وحتى خالد بعد ما بيقرا الرسالة بيصرخ ويستنكر ليه فضلت ده وبيتوعده بالانتقام
غير كده الرواية اجمالا جميلة، حزينة وشاعرية جدا، لكنها مختلفة جدا وجميلة بالرغم من كل شيء.
