سر كل المشاكل!!!
معاكم الأستاذ عارف اللي عارف سر أي مشكلة بتواجهكم
عارفين إيه السر؟!!!
العشم!
العشم من وجهة نظرك سواء كنت صح وللا غلطان.
إنت يا أستاذ يا اللي هناك اتعشمت لما تشتغل مديرك يقدرك صح ويعاملك بإنسانية
وإنت يا بيه اتعشمت اللي شغالين معاك يصونوا أكل عيشهم ويحافظوا عليه ويبقى عندهم أمانة وميكسروش ثقتك فيهم
وانتي يا هانم اتعشمتي جوزك ميخدعكيش ويقدر مسئوليتك الكبيرة اللي هو شخصيا ميقدرش يتحملها واتعشمتي يهتم بيكي ويحسسك إنك ملكة الدنيا
وإنت يا ابني وانتي يا بنتي اتعشمتوا أهاليكم يحسو بيكم ويفهموكم ويعرفوا فرق الأجيال ويقوّموكم برحمة وحنية
وإنت يا حاج اتعشمت ابنك يحترم شيخوختك ومرضك وميقساش عليك ولا يحسسك بعجزك ويقدر تعب السنين
وانتي يا أمي اتعشمي ولدك يكون بار ليكي بعد جوازه ومتشحتيش منه الزيارة والسؤال والاهتمام
وحضرتك يا اللي واقف ورا اتعشمت مراتك تقدر ظروف شغلك وصعوبة الحمل اللي فوق كتافك ومحاربتك في الدنيا عشان تكفي بيتك وأهلك واتعشمت تكون سندك ونصك الحلو اللي يهون عليك مرارة الدنيا وبلاويها
وإنت يا جدع اتعشمت صاحبك ميخذلكش ميخونش صداقتك يقف معاك في وقعوك يبقى أخوك اللي مش من أمك وأبوك
وإنت يا اللي بتبصلي اتعشمت أخوك يكون سندك وضهرك وإيدك التانية اللي تشيل معاك القفة اللي بودنين اتعشمت يخاف عليك وعلى مصلحتك ويكون معاك ضد الكون
وأنتم كإخوة اتعشمتوا تفضلوا حبايب بعد موت الوالدين والورث يقربكم أكتر مش يخليكم أعداء تحاربوا بعض
أما إنت يا اللي ساند على الحيطة ومش قادر تقف على حيلك اتعشمت بلدك وحكومتك تعيشك حياة كريمة وتاخد أبسط حقوقك كإنسان مش تسلب حقك وتخليك تلف حوالين نفسك ومش عارف تلاقيها منين وللا منين
وإنت يا باشا اتعشمت الناس تقدر منصبك ومحدش يستغله ويعرفوك مصلحة وبس
وانتي يا أستاذة اتعشمتي محدش يهينك في شغلك ولا يندمك على خروجك للعمل
أما انتي يا ست الكل اتعشمتي إن الرجولة متموتش والأخلاق الفاضلة تكون في كل مكان ومحدش يقرب منك بتصرفات حيوانية وغير أخلاقية
وإنت يا أستاذ اتعشمت إن الراجل اللي اديته بنتك أمانة يعرف يحافظ عليها ويصونها ويعززها
وإنت يا طالب اتعشمت كل واحد ياخد على أد مجهوده مش النجاح والتفوق يروح للغشاشين والضياع والانهيار والصدمات النفسية للي اجتهدوا ومعتمدوش على الغش
صدقوني كل المشاكل دي وغيرها وغيرها هتلاقوا السر يصب في بحر العشم.
Hoda
