أنا ماكنتش مخططة أقرأ الرواية أصلًا، بس أول فصل ندهني زي النداهة وانا الصراحة روحت وراه..

الفكرة كانت جديدة لدرجة إن الفضول اشتغل قبل أي حاجة تانية، ومع كونها رواية قصيرة، كملت وأنا مطمّنة إن الرحلة مش هتطوّل… وده كان قرار صح.

أكتر حاجة حبيتها فعلًا هي الشخصية الرئيسية.

شخصية قريبة، خفيفة دم، ومكتوبة بذكاء. الضحك هنا مش مصطنع، ولا جاي على حساب العمق. بالعكس، الحس الإنساني في طريقة التفكير والتعليق على الأحداث خلّاني مكملة ومهتمة أعرف هي رايحة فين .بس الأهم إنها مكتوبة بوعي نفسي واضح. الضحك هنا مش هروب من التوتر، لكنه آلية دفاع: طريقة الشخصية في التعامل مع غرابة الواقع والضغط اللي حواليها.

السخرية والهزار بقوا وسيلة توازن نفسي، مش مجرد إفيهات وده ظاهر في طريقة ملاحظتها للتفاصيل وتعليقها الداخلي على الأحداث. إحنا شايفين العالم من عدستها، وده خلق إحساس بالألفة والانتماء، خلّاني أكمل وأنا عايزة أشوف هيحصل لها أيه!

الإيقاع سريع، والأحداث ورا بعض من غير مطّ أو ترهّل، وده حافظ على تماسك الحكاية وخلاها قراءة ممتعة وسلسة.

وده بيحاكي حالة الانجراف النفسي اللي بتعيشها الشخصية نفسها: أحداث سريعة، قرارات متلاحقة، ومساحة قليلة للتوقف.

الملاحظة الوحيدة — واللي عشانها الرواية 4 نجوم مش خمسة — إن العالم النفسي المتكامل اقتصر تقريبًا على البطلة بس.

الرواية مليانة شخصيات ثرية جدًا، باين إن ورا كل واحد فيهم حكاية وصراع داخلي، لكننا ما دخلناش جواهم بالرغم من وجود فرصة للبطلة أنها تعمل كده. وده مخليهم يمرّوا كرموز أكتر من كونهم بشر كاملين.

ولو الكاتبة كان غاصت شوية في دوافعهم ومخاوفهم، الرواية كانت ممكن تتحوّل من تجربة ممتعة… لتجربة نفسية أعمق بكتير.

ومع كده، الرواية نجحت جدًا كفرصة "سعيدة" أتعرف بيها على الكاتبة. حسّستني إني قدام قلم فاهم النفس البشرية، حتى لو اختار يركّز عدسته على شخصية واحدة بس.

بناءً عليه #سو_ريفيوز لـ حارس بيت الزواحف ⭐️⭐️⭐️⭐️☆\ ⭐️⭐️⭐️⭐️⭐️

يستحق القراءة،

خصوصًا لو بتحب الروايات القصيرة اللي ليها طرح جديد وفريش..

وشخصية رئيسية إنسانية، مضحكة، وومليانه تناقضات خلتني أشوف نفسي فيها في بعض المواقف.