مجموعة قصص قصيرة جدًا ، يعني تقدر تقرأ قصة أو اتنين قبل النوم وتحس إنك فعلاً شبعان من القصص مش بس قريت لا إنت عشت لحظات مميزة مع القصص أسامة علام بيكتب بقلم شاعر بيحب التفاصيل الصغيرة وده بان أوي في قراءتي الأولى له في طريق متسع لشخص وحيد

يعني هنا عصفور قرر يعيش في البلكونة بتاعتك، قطة بقت الصديقة الوحيدة في الشتا البارد في نيويورك، شخص غريب في الشارع بيحكيلك عن زهور هيشتريها لمحبوبته حاجات بسيطة أوي بس بيحولها لشيء يقشعر منه الجلد من الجمال والحزن مع بعض.

الأجواء غربة خفيفة مش غربة اللي بتعيط وبتكره الدنيا لا غربة اللي بتخليك تبتسم وأنت حزين، اللي بتقولك ايوه أنا بعيد بس لسه قادر أحب وأتأثر معظم القصص في نيويورك ونيوجيرسي، وكأن المدينة نفسها بقت شخصية الشوارع المترو الثلج المقاهي الصغيرة كل ده بيشارك في الحكاية.

أحلى حاجة في الكتاب إنه بيخليك تحس إن معظم القصص حقيقية، يعني أسامة علام واللي دكتور بيطري و عايش بره من زمان بيحكي تجاربه أو ملاحظاته بطريقة تخليك تقول أكيد ده حصل معاه فعلاً علاقته بالحيوانات تحديدًا العصافير والقطط والكلاب بتكون أقوى من علاقات كتير بين البشر، وده بيضرب في العمق لأن كتير مننا في الغربة بنلاقي الرفقة الحقيقية في الكائنات دي مش في الناس.

مناسب جدًا للـ late night reading، لما تكون الدنيا هادية وأنت عايز حاجة تريح قلبك هيخليك تبتسم كتير، ودموعك تنزل من غير ما تحس القصص قصيرة فمش هتزهق، وكل واحدة مستقلة بس الكل مع بعض بيرسم لوحة واحدة عن الإنسان والحنين والأمل الصغير. الغلاف والرسوم الداخلية تحفة، بجد بتكمل الجو.

(أنا شخص لا يمتلك حياته بدرجة كافية. حياتي معقدة بالكيفية التي لا أستطيع وصفها. لكني أستطيع التأقلم معها. أحاول فقط أن أجعلها تمر بلا كثير من الألم.)

#عالم_اسامة_علام_الروائي_في_الفنجان

#مسابقات_فنجان_قهوة_وكتاب

#فنجان_قهوة_وكتاب

تقييمي: ⭐️⭐️⭐️⭐️⭐️ 🌙✨