كتاب التحولات البسيطة للكاتب الدكتور (يحيى حسن عمر)

بيقدملنا تجربه فنية مختلفة ورؤية جديده للقصة القصيرة...

فالعمل جمع بين سمات البحث التاريخي لما فيه من دقة شديدة في تحديد أسماء المدن وتواريخ المعارك وأسماء الشخصيات والمصداقية في توضيح الحدث الحقيقي والجزء التخيلي للكاتب ومقدمة كل قصة بصفحة أو أكثر لتهيئة القارئ للفترة الزمنية التي تشملها أحداث كل قصة منفردة ووجود العديد من الملاحظات داخل كل قصة مما كان له أثر جيد في فهم تتابع الأحداث ..

الشخصيات مرسومة كويس جدا وباين صراعاتهم الداخلية وسوء أو نبل أخلاقهم وتأرجح الشخصية بين الخير والشر كان باين جدا في سياق الأحداث .

ووضح جداً إن ضروري صاحب خطة الحرب ومنفذها يكون له قدرة على إتخاذ القرار في الوقت المناسب بعيد كل البعد عن المماطلة أو التأجيل أو مراعاة الجوانب الإنسانية في الحرب وفعلاً بين إن الحرب خدعة وكل شئ مباح في الحروب.

الصراع..

إنقسم الصراع في هذه المجموعة القصصية إلي أربع أنواع من الصراعات...

الصراع الواضح..زي الصراع بين حنبعل ومهاربعل

والصراع بين السلطان الشاب سليمان وإبراهيم باشا برجالي

الصراع الغير واضح زي الصراع بين أنور السادات وحافظ الأسد ..

وبين سليم الأول العثماني والسلطان المملوكي قانصوه المملوكي في بداية الأحداث

والصراع بيختلف لو كان مع ولي العهد عنه لو كان مع شخص آخر زي صراع ولي عهد ألمانيا مع الملك

الزمان..

الإهتمام بالزمن في القصص كان واضح جداً لأن سياق الأحداث بتتوقف على الزمن..بنلاقي حروب حصل فيها هزيمة بسبب شدة الأمطار في فصل الشتاء..وجنود كل همها ترجع بلدها قبل الشتاء.. والتخطيط إن الحرب تبقي في الربيع وتنتهي قبل الأمطار الغزيرة!

وكمان أهتم الكاتب بوقت بدأ الحرب بيفرق قبل طلوع الفجر أو وقت النهار والتأخير لمدة ساعة بيغير مصير حرب كاملة..

المكان.. الإهتمام بالمكان واضح لأنه بيحدد الطرق إللي الجنود سلكوها للوصول لأرض المعركة والوصف كان عبقري مثال إنتظار الجنود لاختفاء أثر الطين الناتج عن ذوبان الجليد..

الوصف في القصص كان دقيق..من وصف أماكن الجنود وخطة الحرب والمعدات المستخدمة حرائق المدن والاحتفالات بالنصر...

العنوان لكل قصة كان بيعبر بشكل جيد جداً عن المضمون

واللغة المستخدمة كانت سهلة وبسيطة ومتنوعة ومناسبة جداً مع زمن الأحداث وموضوعها

ودي أمثلة لبعض الجمل القوية إللي خدمت النص وص بشكل ممتاز

(البرابرة الذين أحرقوا روما....قوي أخري تدافع الغروب.. ثم كانت بينهم السيوف العلاقم.. كأمس الذاهب..غيوم الحرب..رحي الحرب.. إن شمس فرنسا إلي الغروب ..يتداعي كتمثال الملح يذوب في فيضان..اختفي قلب برلين من الوجود وسوي بالأرض ..بسرعة الحروب القصوي.. حكومة حرب..لما داقوا طعم السلطة بقوا ديابة سعرانة ..إحداث إرباك إستراتيجي ومعنوي وسياسي..هذا دمار الهيكل التالت ..انقذ شعبك.. منطقة محرمة فصوتي فيتو كما تعلمون..هيبة الأسد البريطاني العجوز..سكران بنشوة الإنتصار ..أجواء مشحونة من الغضب ..وقف مشلولا كالمعتاد ..المسعي الأخير.. البرابرة الذين أحرقوا روما..)..

العنصر النسائي كمان كان موجود في الفصول ومتوظف كويس جدا حسب أهميته.. يعني دور زوجة السادات جاء بسيط جدا إنها بتقدم دعم معنوي لزوجها..

دور كلا من جولدا مائير ومارجريت تاتشر بيبين قوة شخصيتهم وإنهم مقاتلات في حب أوطانهم..

وحضور ملكة بريطانيا في الأحداث كان عبقري على الورق كما هو في الحقيقة تماماً..صوريا..

غير دور زينب هانم الوكيل إللي إعترضت بشكل صريح مع زوجها..

ودور خديجه زوجة إبراهيم باشا وقوتها ولينها في نفس الوقت مع الزوج..

ودور السلطانة خرم زوجة السلطان سليمان كان لها دور في تحريك الأمور السياسية..

والأميرة كاترينا وقصتها مع بلطجي باشا

بسؤال واحد من الكاتب أعادنا لصفحات طواها النسيان من التاريخ ( ماذا لو ؟!!)..

هل التغيرات البسيطة المقترحة من الكاتب لو تحققت وقت الحروب كان ممكن يتغير مصير العالم حالياً.. هل التغيير كان ممكن فعلاً ولا في أحداث كانت فارضة نفسها بكل قوة مهما كانت الظروف أو الخطط..

من خلال المجموعة القصصية وعلي مدار ١٣ قصة مختلفة في حقب زمنية متنوعة الكاتب ذكر كل أسباب الحروب..معظمها كان نهب ثروات دول واحتلال الدول التي تحتوي على مناجم أو استيلاء على أراضي صالحة للحياة أو استرداد اراضي منهوبة وغيرها....

وبين كمان اهميه التطور والصناعة في الحروب..وازاي الدول بيبقي لها اليد العليا بمجرد وجود معدات حرب وقطع غيار ومعدات آلية وبنزين طائرات وغيرها من الوسائل المستخدمة في الحرب ..

وفي آخر فصل صدمنا بهل الحرب المستقبلية هتبقي على المياه!!!!!؟

وده ملخص بسيط لفصول الكتاب مع مراعاة عدم حرق مضمون كل قصة..

الفصل الأول..

حنبعل ( هنيبال يقتحم الأبواب)..

بيبدأ الكاتب بقصة حنبعل ومن خلال مجريات القصة بنشوف هل حنبعل كان له القدرة على اقتحام الأبواب فعلا ولا ظل على الأبواب...الكاتب بيحطنا في حيرة عن شخصية القائد ده إللي من وجهة نظري هو قائد عظيم يتحلي بشيم الفرسان هو كان عنده إستعداد يحارب بإستماتة علشان يحقق مجده وده ظهر لما عبر بالجنود والافيال وو.. جبال الألب..ولكن معندهوش صفات دموية..كان فيلسوف أكتر منه محارب وده ظهر لما قال لمهاربعل..( لو محونا العدو لجاء العدو التالي يريد محونا)..

وكمان ( لقد دمرت سمعتي وسمعة قرطاجة..سيقال عنا إلي الأبد البرابرة الذين أحرقوا روما) ..

في المرويتين الافتراضية والحقيقية عن الحرب حسيت بالمرارة وأنا بقرأ الأحداث وحجم الدمار وحرق البساتين والبيوت والشوارع وقتل الجنود في الأول إتعاطفت مع روما وكرهت مهاربعل.. وفي الأحداث الحقيقية حزنت على مصير حنبعل جداً..

وجه في بالي أسئلة كتير زي..

كان هيبقى مصير قرطاجة إيه لو كان متوفر عندهم مناجم ومفيش حاجه ملحة للحروب..

لو والد حنبعل ممتش وهو لسة عنده عشر سنين هل تربيته كانت هتختلف لو كان شاف قوة والده في الحروب..كان هيبقى عنده قدوة مثلاً تشجعه على إتخاذ قرار جيد في الحرب..

وايه كان هيحصل لو مهاربعل كان هو القائد للحرب..

وهل سهل على الشخص ياخد القرار لو هو مش في موضع القيادة؟!!

..بيبقي مغامر أكتر؟!!

..هل بيبقي عنده شخصية تنافسية عايز يثبت نفسه أكتر وفي الآخر الهزيمة مش هتبقى في وشه زي القائد الأساسي؟!!..

الفصل الثاني جاء بعنوان..

مرج دابق - المدفع لا يكسب أحياناً -

الكاتب بيحطنا هنا في حالة من الدهشة..استغربت جداً من شخصية سليم الأول العثماني وتفاوت أفعاله من شدة القسوة لشدة اللين وده ظهر في رد فعله لما أعدم رؤساء الفرق الانكشارية..وقطعه لرأس جده..وقضائه على الصفويين..ومكره مع السلطان قانصوه الغوري..

وفي نفس الوقت كان لين إنه أمر الجنود بحسن معاملة السلطان الغوري لو وقع في الأسر وأنهم يكرموا جثمانه ويحضروه في حالة وفاته وفي نفس الوقت حذرهم بإنه يهرب منهم!!!

جملته (السلاطين أعظم من أن تجز رؤوسهم) بتدل على أخلاقه النبيلة..

في الفصل ده كانت النهاية هتبقي جميلة ومرضية لكل الأطراف لو قانصوه الغوري سمع كلام سيباي وإقتنع إن خاير بك خاين...

وكمان كان غريب موقف الجنود إللي محبوش يكملوا المعركة علشان يرجعوا بلادهم وقت فصل الشتاء..

فكان هيحصل إيه لو استمر السلطان سليم الأول العثماني في المضي قدما في بلاد فارس وهل ده كان هيآثر على الفترة التاريخية التالية كلها وتاريخ الإسلام ولا إيه ؟!

نهايه السلطان قانصوه الغوري محزنة جداً وتصرف أتباعه معاه بعد موته رغم قسوته كان الأفضل له..

الفصل الثالث بعنوان

فيينا ـ السلطان في قلب أوروبا -

بعد ما بنعيش ملحمة من النجاحات المتتالية للسلطان سليمان وصهره الصدر الأعظم إبراهيم باشا..من فتوحات متعددة ودخول فيينا وقوة إبراهيم باشا وحبه لحنبعل إللي بسببه دخل روما وتطورات الأحداث بينه وبين السلطان من خلافات وتمرد . بنلاقي نفسنا أمام النهاية المعاكسة لأحداث الفصل..

فمضمون الفصل كان ماذا يحدث لو السلطان سليمان سمع نصيحة إبراهيم باشا ؟!!

وكان هيحصل إيه لو فصل الشتاء مكنش فيه أمطار غزيرة العام ده؟!

الفصل الرابع جاء بعنوان

(بلطجي ) يحطم رأس (بطرس الأكبر)

القصة دي محيرة فمصير بلطجي باشا محزن في الحدث التخيلي والحقيقي...لو مات مسموم أو عزل من منصبه آمرين كلاهما مر...

كان محارب قوي قدر يحصل على مكاسب كتيرة من حربه مع القيصر بالإضافة إلى رجوع الأراضي إللي اتاخدت من العثمانيين في معركة كالوجه...

في القصة الخامسة والسادسة (غزو بريطانيا ١ و٢)..

الكاتب هنا بيبين مهارة نابليون وإزاي ملاحظته للعب أطفال في مصر تنتجله فكرة تساعده على غزو بريطانيا..وبيوضح مدي ذكائه ومعرفته مواضع ضعفه وقوته هو وخصمه كمان وده إللي خلاه يستبعد قدرته على إحتلال بريطانيا بريا بسبب قوة جيوشها..

في الفصلين دول الكاتب وضح نقط قوة وضعف كلا من نيلسون وبونابرت ..

مشاهد الحرب في البحر والجمل المستخدمة في الوصف كانت عبقرية ودخلتنا في اجواء المعركة وكأننا بنتابعها من خلال عالم افتراضي حقيقي

السؤال إللي شغل بالي من زمان إزاي مقتل ولي عهد النمسا كان شرارة لبدأ الحرب العالمية الأولى؟!

ليه كل الدول دي كانت متعطشة للحروب والقتل والدمار لهذا الحد ؟!!

والجواب جاء مفصل في الفصل السابع والثامن والتاسع..

٧- الحرب العالمية الأولى - سقوط باريس مجدداً

٨- الحرب العالمية الثانية - البريطانيون ‏

‫يستسلمون في دنكرك

٩-الحرب العالمية الثانية - جبهة الباسيفيك -

كيف أن وفاة فرد واحد من الممكن أن تكون حجر الزاوية في اشتعال حرب عالمية..

احترام الامبراطور لرأي ولي العهد على عكس المتعارف عليه وكيف أن الدول كانت في حالة استعداد تام للحرب كلا منها يريد أو استرداد جزء من أرضه أو تعويض هزيمة سابقة أو الحصول على المزيد من المستعمرات..

كيف أن الهزيمة تجمع الدول والنصر يجمع الدول..دور الشعب في الإطاحة بالحكام انتشار الشيوعية وهكذا..

ذكاء المتفاوضين والضغط على الانجليز بسيادة الإنجلو ساكسون والقرابة بين الملوك..

في الفصول التلاتة دول شرح مفصل للحرب العالمية الأولي والتانية من أسبابها الحقيقية الظاهرية والباطنية وهل الحرب وليدة اللحظة ولا سببها ممكن يكون تصفية حسابات ومحاولة مداوة جروح لم تندمل لدول من دول أخري..

بيبين لنا أهمية العلم والتطور وازاي القنبلة الذرية كان لها تدخل حاسم في الحرب..

بين كمان هل الحكام زي هتلر وموسليني وغيرهم كان بالوحشية والقسوة إللي اتعرفت عنهم فعلاً..

بين نتيجة تهجير اليهود من بلادهم وازاي ده مآثر على فلسطين لحد النهاردة

بين استخفاف الدول الكبري بالشرق الأوسط عموماً وإزاي كان بيقسموا مكاسبهم

بين قوة الشعوب إللي رغم القهر والسكوت أوقات كلمتها بيبقي لها معني وبتدخل في تغيير مجري التاريخ..

القصة العاشره ( ثورة يوليو ١٩٥٢)

في الفصل العاشر وضحلنا كان هيحصل إيه لو اللواء محمد نجيب كان أكثر شدة في التعامل مع جمال عبدالناصر وأصحابه... إزاي تهاونه معاهم قضي على الحياة السياسية في مصر..ووضحلنا إزاي مصر كانت محكومة الفترة دي وإنها كانت جايزة واتقسمت على إللي فازوا فقط.. استغربت جه في بالي سؤال هل حداثة السن وعدم الخبرة والتهور وحب النفس أحيانا ممكن يبقى افضل من رجاحة التفكير وتغليب المصلحة العامة والحفاظ على الكلمة!!!!..وده ظهر جداً في وضع جمال عبدالناصر ومحمد نجيب .

القصة الحادية عشر (حرب أكتوبر الضربة الجوية السورية الأولي)

القصة دي من أجمل القصص تنوع الحوار فيها ورحلة السادات السريعة لسوريا وكلامه مع الأسد وخطة الحرب إللي رسمها الكاتب لو كانت سوريا ومصر إتحدوا في الحرب ضد إسرائيل قراءه حالمة جميلة ولكن للأسف الواقع إن السادات وحافظ الأسد كل واحد خبي خطته للحرب عن التاني وده إللي دخلنا في خساير كان ممكن نتفادى حدوثها رغم انتصار مصر في الحرب ضد إسرائيل

القصة الثانية عشر .. حرب فوكلاند ( الأولي والثانية)..

هل الفرنسيين فضلوا شايلين في قلبهم من بريطانيا لدرجة إنهم يساعدوا الأرجنتين ويمولوهم بالصواريخ في حربهم ضد بريطانيا؟!

❞ الفرنسيون منافقون، أعلنوا دعمهم المطلق لبريطانيا بينما فِرَقُهُم الفنية - خاصة المتعلقة بإكسوست - تعمل سرًّا في قواعدنا. ❝

في الفصل ده الكاتب بيوضح أهمية المخابرات الحربية وامتلاك الصواريخ..والقنبلة النووية..وقوة شخصية القائد ( مارجريت تاتشر).. في صناعة الحرب..

أي أن مقاومات الحرب الناجحة هي العنصر البشري القوي والتطور العلمي الكبير.و وجود حليف قوي

القصة الثالثة عشر ..السدان

القصة دي كانت موجعة جداً بالنسبة لي قلبي وجعني وأنا بقرأ الأحداث وعرفني إن الخطر قريب أوي وهل فعلاً ده ممكن يحصل في مصر بسبب السد وإن إزاي رغم كل التطور الحاصل عالمياً هنرجع تاني ندور على أبسط حقوقنا وهي وجود المياه 😭😭😭

اقتباسات من العمل..

❞ يَحِقُّ لنا أن نفخر بطريقة تامة، لقد فعلنا ما لم يفعلْه أحدٌ منذ وليم الفاتح(41)، واقْتَحَمْنَا الحِصْنَ العظيمَ المُحْتَمِي بالبحارِ والذي اسْتَعْصَى على الفاتحين منذ سبعة قرون ونصف القرن، حتى الأرمادا الإسبانية العظيمة لم تستطع الوصولَ إليه(42)، وها نحن الآن ❝ص١٣٠

❞ في 28 يونيو كان وليُّ عهد إمبراطورية (النمسا والمجر) الأرشيدوق فرانز فرديناند مع زوجته في زيارة لسراييفو، فأُطْلِقَ على موكبهما النار فأُرْدِيَا قتيلَيْن، واتهمت الإمبراطورية النمساوية صربيا بأنها وراء الحادث، وأرسلت لها إنذارًا مُهِينًا ❝. ص١٧٦

❞ هُمَّ عايزين يحكموا، وواخدين البلد في سكّة سودا، وأنا بسأل سيادتك: هل كان من أهداف الثورة إنها تحكم البلاد؟ هل كان من أهداف الثورة إنها تكمّم الأفواه وتقيّد الحريات؟! هل كان من أهداف الثورة إنها تملأ المعتقلات؟! هل كان من أهداف الثورة إنها تُقحم الجيش في السياسة وفي كل مرفق من مرافق البلاد؟! هل مفيش حدّ من أبناء مصر من يقوم بالأعمال دي ويتفرّغ الضباط لشغلهم وجيشهم؟! ويرجع للجيش نظامه. ❝ ص ٢٦٩

-في النهاية المجموعة القصصية دي عرفتني أجزاء كتيرة في التاريخ مكنتش أعرفها..

وفي نفس الوقت أعتقد إن المادة المقدمة في القصص القصيرة هنا كان ممكن يبقى افضل لو إتعملت في مجلد ضخم..

وكمان حبيت جداً إهداء الكاتب المجموعة القصصية لزوجته..

التقييم..٤

نبذة عن الكاتب

الدكتور يحيى حسن عمر مؤرخ ومهندس وكاتب مصري حاصل على بكالوريوس الهندسة جامعة عين شمس عام ١٩٩٥ ودرجة الماجستير في الهندسة جامعة عين شمس عام ٢٠٠٠ ودبلوم الدراسات الإسلامية وليسانس الأداب قسم التاريخ من كلية الآداب جامعة عين شمس عام ٢٠٠٤ وماجستير في التاريخ جامعة القاهرة عام ٢٠١٧ بتقدير امتياز الرسالة بعنوان "تاريخ مصر في كتابات محمد حسنين هيكل ١٩٤٢- ٢٠٠٣.

وحاصل على درجة الدكتوراه في التاريخ من كلية الأداب جامعة القاهرة عن رسالة نوقشت قبل عامين (ديسمبر 2023) بعنوان " مراكز القوى السياسية وأثرها في المجتمع المصري 1952 - 1971)، وحصلت الرسالة على تقدير إمتياز مع مرتبة الشرف الأولى (أ)، والتوصية بتبادلها مع الجامعات الأخرى

صدر له مجموعة من الكتب من بينهم التحولات البسيطة وكتابات هيكل بين المصداقية والموضوعي

‏

#فنجان_ومراجعة_التحولات_البسيطة

#أبجد

#التحولات_البسيطة

#يحيى_حسن_عمر

‏

‏

‏

‏

‏

‏

‏