المرة دي في الحكاية صراع أبطالها بيكبر، التحديات مبقتش بشرية بس، فيها من الجن جانب، جنيّة اسمها "جهرا" بتروح لأول مرة أرض البشر لوحدها من غير ما "جيرا" يكون معاها أو يخليها هو تروح تعمل فيهم حاجة!

زي اللي كان بابا وماما بيعدوه الشارع وهما ماسكينه بين إيديهم الأول -بغض النظر أن جيرا كان يوديها تعمل بلاوي مش حاجة خير- وبعدين وهو لسة يعيني في كيجي عدى لوحده وسط عربيات كتير وزحمة يا هتدوسه عربية ويروح فيها أو حد ياخد باله ويوقف ويقعد يزعق أن ليه أهله مش موجودين!

التشبيه اللي ذكرته عامل زي نقطة في بحر أحداث العدد التاني من ورد الحكاوي.

سهرت شوية على العدد دة بعد ما خلصت جزء من المحاضرات وخلصت نصه في جلسة يعتبر، ودة أن دل على شيء فأكيد أن العدد دة أحداثه مشوقة جدًا ودخول جهرا في الحكاية خلاها تشعلل، مع كل حركة في بداية جهرا بقول هي رايحة تهبب إيههه.

عاجبني أن الشخصيات اللي تم التسليط عليها كانت مختلفة القوة عن العدد الأول، مش اللي هو احنا هنلعب في حكاية مزاهر وأبوها تاني ولفي بينا يادنيا، والأغرب كمان بالسنبالي إن العدد التاني أقوى من الأول، مش كتير بلاقي أن الجزء التاني أو ما بعد الأول بيبقى حلو وفي قوته، بس في العدد دة اتغيرت الفكرة.

شخصية شاشناق كانت مريبة وتحسسك بالشك ناحيته، زي ما كل أو أغلب الشخصيات بتشك في تصرفاته ومش دايمًا بيأمنوله، فهو كانت حتى ليا كقارئة وشايفة يعتبر زي الراوي العليم أغلب الأحداث من واجهة أحكم من الشخصيات، شخصية مريبة متعرفش هي الخطوة الجاية ممكن تتصرف إزاي

اللي قل ظهوره بس ليه تأثير برضو كان أبو الخوالد، بقي حكيم أكتر من الأول ورزين في أفعاله.

باقي الشخصيات ليهم دور فعّال في الحكاية، مش هتطرق ليهم علشان أسيب القرائ اللي هيقرأ الريفيو البسيط دة يتحمس للباقي.

العدد دة كانت نهايته حزينة، خصوصًا إني تعلقت بكل الشخصيات، وهدخل على التالت على طول أشوف الباقي وممكن يتصلح دة كله إزاي.

اسمتعت بالعدد جدًا وزي ما في الأول أسلوب الكاتبة حلو أوي وسلس، واللغة البسيطة الملائمة للجو العام كمان🤩

#فنجان_ومراجعة_سلسلة_ورد_الحكاوي

#كتوبيا_للنشر_والتوزيع

#مسابقات_فنجان_قهوة_وكتاب