اسم العمل:اصوات الليل
الكاتب:كريم قنديل
التصنيف:كتاب صوتى مدته 42 دقيقة /رعب نفسي
التقييم:⭐⭐⭐⭐⭐
«بعض الأصوات لا نلق لها بالا أن سمعناها أثناء يوم مزدحم ،لكنها قد تكتسب معنى آخر إن سمعناها وحدها.. فى الليل بلا أى ضوضاء »
مش مجرد رواية رعب عادية؛ دى تجربة نفسية كاملة تعتمد على الرعب النفسي أكثر من المشاهد الصادمة، مبنية على الخوف من التفاصيل الصغيرة( صوت غامض، اختفاء مالوش تفسير) مليانة توتر وغموض، بتحكي عن الأصوات الغامضة اللي بتظهر في الليل وتأثيرها على حياتنا،مش بس قصة رعب، ده كمان استكشاف للخوف اللي جوة النفس البشرية..
" مفيش إنسان معندوش حاجة بتخوفه لوحده "
( انا لحد دلوقتي مبعرفش انام من صوت عقارب الساعة والثلاجة اللى مش اوضتى اصلا 😅 مش هخبى عليكم بقوم افصلهم اوقات 😂)
لكن بطل القصة كان سمع الاصوات بالنسبة له مرتبط باختفاء الأطفال من المنطقة اللى عايش فيها واولهم كان إبراهيم صاحبه ..
ياترى ايه السبب ؟
ايه علاقة المهرج ؟!
هل ابراهيم الوحيد اللى اختفى ؟
ياترى الأصوات أوهام وكوابيس طفل ؟
ياترى هيحصل ايه بعد ٣٠سنة؟
الأداء الصوتي جميل جدا بيخلق حالة توتر واقعية، طريقة السرد تجعل المستمع يشعر بأنه داخل رأس البطل ،يسمع ويشعر ويفكر في نفس الأسئلة التى تدور فى عقله، تعتمد على الشك، الهواجس، مع كل فصل المستمع بيشك أكثر هل ما نسمعه حقيقي؟ أم مجرد انعكاس لخوف داخلي يكبر ببطء؟
الموسيقى فى الخلفية متناغمة ومتوزانة مع ايقاع الحكى الكاتب أبدع فى المساحة بين الحقيقة والخيال فكانت تجربة ممتعة بالنسبة ليا