بقالي كتير بدور على حاجة في الأدب العربي تملأ خانة الـ Medical Thriller بجد، مش مجرد ديكور مستشفى وأطباء بيتكلموا لغة عربية فصحى مقعرة ومصطلحات طبيه غريبة و أعراض مرضية مش مشهورة. "شريعة منصور" كانت مفاجأة سارة.

أولاً: احترام العقلية (أهم نقطة) أنا كقارئ بقدس المنطق، وبكره "الفهلوة" في العلم. الكاتب هنا لعبها صح. دمج العالم الطبي بعالم الجريمة بشكل فيه احترافية وبحث (Research) محترم. التفاصيل الطبية مش محشورة عشان المنظرة، لا دي جزء من النسيج الدرامي. حسيت إني بالفعل في قلب الأحداث و بقلب الصفحات عشان أعرف ايه اللي هيحصل، وده خلاني أطمع وأقول: "أنا عايز من ده تاني، وعايزها سلسلة".

ثانياً: "الشرير" اللي بنحبه مشكلة الروايات العربية مؤخراً إن الشرير "شبح" ملوش ملامح، أو "سايكو" من غير سبب. هنا التحول كان منطقي، متأنّي، ومبرر. فكرني جداً بأشرار روايات "دان براون" (زي Silas في The Da Vinci Code مثلاً)؛ ناس عندهم قضية وفلسفة، وشايفين إن اللي بيعملوه ده قمة العدالة حتى لو العالم شايفه جنون. التحول السلس للشخصية هو اللي بيخليك تكمل وأنت مشمئز ومتعاطف في نفس الوقت.

ثالثاً: الدكتور "هشام" الشخصية دي لمستني جداً. شغف المعرفة، الكتب،.. تفاصيل إنسانية خليتني أحس إنه صاحبي اللي ممكن أقعد معاه على القهوة نناقش نظريات.

رابعاً: شوية ملاحظات عشان اللي جاي الرواية حلوة؟ اه. ممتعة؟ جداً. بس هل وصلت لمصاف العالمية في النوع ده؟ لسه شوية. العمل محتاج "اتقان" أكتر، محتاج حبكة أعقد شوية تخليها تقف راس براس مع كبار اللعبة دي في العالم. بس كبداية؟ هي بداية واعدة جداً، وأنا حاجز تذكرتي في الصف الأول لأي جزء جديد أو عمل قادم للكاتب ده، لأني حاسس إني ممكن أكون جزء من العالم ده.

رواية ذكية، حوارها طبيعي وغير مفتعل، احترمت ذكاء القارئ وماستخفتش بيه. تجربة تستحق القراءة وتشجيع لنوع أدبي مفتقدينه بشدة في مكتبتنا العربية.