كنت متردد أنزل الريفيو دا عشان ميحصلش مشاكل معايا ووجع دماغ .. بس في شيء مستفزني مش قادر أسكت عنه

الرواية دي فازت بجائزة القلم الذهبي من لجنة تحكيم قوية جدا جدا جدا ، أسماء الواحد بيتمنى يتصور معاهم

ولكن على النقيض .. الرواية بتتجمع فيها كل عناصر الفشل اللي تخليها أسوأ رواية رعب ممكنة

تعالوا نشوف :

١- محتاجين نفهم الروائيين ان اللغة مهمة جدا في روايتك، وهنا منقصدش اللغة الصعبة التقيلة، اللغة المناسبة لبيئة كل شخصية ، الطريقة اللي بتعبر بيها عن شخصيتك

يعني كاتب الرواية اختار انه يخلي الحوار بالعامية .. مافيشة اي مشكلة ❤️

لكن مينفعش في قلب العامية تقول مصطلحات بالفصحى زي

( تجاه - نحو - المنزل - خطوت - ارتعشت قدماي ) وكلمات تانية بالفصحى كتير جدا متطلعش من لسان حارس مشرحة غلبان

٢- الحبكة من أسوأ أسوأ أسوأ ما يكون

مافيش حبكة أصلا، يعني لو حبيت احرقلك حبكة الرواية مش هلاقي حاجة اذكرها

مجرد مشاهد المفروض انها مرعبة مرصوصة ورا بعض بغرض الرعب وخلاص ،

٣- يا صديقي كاتب الرعب ، الرعب مبقاش كلمات مرعبة وخلاص ، بطلوا جو الكيانات الشيطانية والروح الشريرة والعوالم السفلية و و و و ، ومتفرضش الرغب عليا ، يعني ليه رواية ليها مقدمة بتقول انك هتحس بالرعب ومش هتعرف تنام و و و ، سبني اجرب نفسي

٤- في جمل غريبة جدا جدا في الرواية

- يقف بخطوات مرتشعة ( ازاي واقف بخطوات ؟ )

- ينعكس من خلاله ظلال لأرواح شريرة ( هي الروح ليها ضل )

-سيطر ضوء الظلام ( ايه ضوء الظلام دا ؟ )

٥- ناهيك عن كمية الأخطاء الإملائية البشعة والمعلومان الطبية المغلوطة

٦- طرق الحل البسيطة السهلة ، ان كل شيء مرمي للصدفة والقدر في إيجاد الحلول للبطل

٧- انتوا متخيلين اننا عرفنا ان البطل متجوز بعد ما خلصت 80% من الرواية ، مافيش أي بناء للشخصيات نهائي

للأسف صفر من خمسة في التقييم

ونزلت الريفيو عشان يكون درس خفيف لينا في الكتابة

وعشان أسأل سؤال

هي اللجنة اللي صح ؟ وانا اللي غلط ؟