من المفترض إنها رباعية يعني رواية على أربع أجزاء زي ثلاثية نجيب محفوظ كدة، ودي الجزء التالت فيها

الحقيقة أنا مش عندي الجزئين الأولانيين ومقريتهمش ولا عندي الجزء الرابع، بس من النبذة المكتوبة على الغلاف فهي بتوضح إن على الرغم من كونها رباعية إلا إن كل جزء منهم رواية مستقلة بنفسها والأحداث بس بتدور في منطقة بحري في الإسكندرية

ومن عناوين الأجزاء من الواضح إنها واخدة أسامي المناطق اللي على أسامي الأولياء: أبو العباس- ياقوت العرش- البوصيري- علي تمراز

من قراءتي أنا بقى للجزء ده فحتى هو مش رواية متماسكة بالمعنى المتعارف عليه

كل فصل فيها يصلح يكون قصة قصيرة لوحده مالوش دعوة باللي قبله واللي بعده

اللي بيربط بين الفصول هو رابط واهي جداً من أسامي الشخصيات

يعني لما يذكر اسم هنا ولا هنا تفتكر ان عدى عليك قبل كدة في حدث قبله

لكن لو تم تجهيل الأسماء مش هيبقى فيه رابط قوي بين الأحداث غير إن كلها بتدور في نفس المكان أو المنطقة يعني

ومش عارفة هل دي حاجة مقصودة من الكاتب إنه يكتب رباعية أجزاءها مش مرتبطة ببعض وفصول كل رواية منها برضه مش مرتبطة ومتماسكة بالمعنى المعتاد للرواية وتصلح إنها تكون قصص قصيرة منفصلة، ولا دي حاجة جت كدة من غير ترتيب لإن الكاتب نفسه مكنش عارف يربط الأحداث ببعضها كويس

لكن على أي حال اللغة وأسلوب السرد كان جذاب وأخاذ جداً، وأنا عجبتني كقصص قصيرة بغض النظر عن تصنيف كاتبها ليها.

#رباعية_بحري #البوصيري للكاتب #محمد_جبريل

#جولة_في_الكتب #روايات

#سارة_الليثي